Sindicato SIMAR: Maestronan kier mas claridad pa por traha

Sindicato di maestro di Aruba (SIMAR) ta comparti nan pregunta tocante e carta cu a ricibi di e cambionan cu lo tin pa studiante y parti di enseñanza. Nan kier mas claridad riba e puntonan di carta.

Presidente di sindicato SIMAR, Josephine Martilia Albertus a bisa cu ta ‘un lastima’ cu no ta wordo envolvi den e toma di decision pa cu medidanan cu ta afecta e parti enseñanza. Tin diferente maestro cu tin incertidumbre cu tin y no por contesta pasobra nan no ta haya e informacion cu mester.

Sindicato a ricibi ‘via a via’ un carta. E carta a wordo manda dia 17 di maart ultimo. Nan a tuma contacto cu Directie Onderwijs. Ayera 19 di maart nan a haya otro carta di Inspectie Onderwijs. Nan a tuma nota di locual tin den e carta, caminda ta skirbi e situacion cu tin di crisis relaciona cu coronavirus.

Sinembargo Albertus a bisa cu den situacion di crisis mester percura pa muchanan por haya nan enseñanza, ‘esey no por wordo perhudica’. “Nos tin di bisa cu minister ta papiando di plataforma educacion digital pa medio di film instruccion.”

Pero cu esey tambe ta bisa cu tin hopi mucha cu no tin internet na cas, no tin computer y tin mayornan cu no ta domina idioma Hulandes of e materia si den caso e muchanan tin pregunta, of no sa con pa atende cune.

Nan a wak tambe cu minister ta urgi pa schoolbesturen ora pidi pa docente pa mantene nan mes y zorg pa salud di docente ta na prome luga. E ta bisa cu mester tin den klas habon, handsanitizer y evita aglomeracion di docente.

E ta agrega cu tin algun scol ta haci’e bon, pero algun otro scol no ta bay manera mester. Ta urgi pa directiva tene nan mes na mandato cu ta haya di nan minister. Si docente ripara cu no ta bay manera mester ta, nan por tuma contacto cu nan sindicato pa wak con ta cana e caminda pa haya informacion, pero semper ‘salud ta na prome luga’.

Nan ta compronde cu ta un situacion fastioso pa motibo cu tambe tin examen. Inspectie Onderwijs ta duna scolnan flexibilidad pa tin tempo pa schoolexamen. “Tur cos mester ta afgerond prome cu central examen. Pa tin tur cifra aden pa e studiante sa con nan ta para. Tambe pa Inspectie Onderwijs tin tempo pa por tuma papel y check tur cos ta bon.”

Den caso di examen ta pidi aclaracion riba e distanciamento social, cu ta 1.5 meter; pero local ta grandi y por hinca 100 alumno cu un distancia di 1.5 meter. Pues mester evita tanto persona den local? E ora cuanto cantidad maximo?

Tur esey ta punto cu sindicato kier contesta riba dje pa nan ta claro. Tambe ora un local caba cu nan examen lo sterilisa esaki despues cu team pa cada local? Tin ekipo pa esey? “Tur e pregunta ta surgi y mester contesta.”

SIMAR ta manda carta pa minister di Enseñanza Y Inspectie Onderwijs pa bin claridad na nan docente, pa asina nan por sigui traha. “Mester e claridad riba kico y con, pasobra salud ta na prome luga.’

Ta keda enfatisa cu ta situacion fastioso; sinembargo no por perhudica enseñanza. Mester purba di traha hunto teniendo na cuenta e parti preventivo, mantene distancia y cosnan cu por wordo haci. “Cada docente sa di e situacion di cada alumno na cas, si mester yama of manda un e-mail pa contesta.”

Nan lo manda contesta di minister concerni y inspectie pa asina tin mas claridad riba nan asunto. Cualkier docente cu mester informacion lo mester tuma contacto cu sindicato y keda zorg pa yuda e muchanan.