Trahadonan di Serlimar SG a tuma contacto cu nan sindicato, SEPPA, pa expresa malcontento enorme cu nan doño di trabao, cu segun nan, ta perhudica nan. Esaki pasobra nan ta pensa cu cualkier momento, APFA por saca nan for di fondo di pensioen, pa motibo cu no a cumpli cu pago di prima.
Ademas di esey, tabatin confusion den calculacion pa e reduccion di salario cu gobierno a introduci na luna di mei/juni, cual Serlimar sea no a haci of no a hacie bon, sino cu despues a bay regla esaki na un forma cu a crea malcontento cerca e empleadonan.
Despues cu e empleadonan a tuma contacto cu sindicato SEPPA, esaki a dicidi di manda un carta pa prome minister Evelyn Wever Croes, apelando na dje pa percura cu e empleadonan di SERLIMAR no ta wordo perhudica den nan pensioen.
SEPPA ta bisa den e carta cu trahadonan di Serlimar SG a trece pa nan diferente asunto cu ta tumando luga na Serlimar SG cu tin nan hopi disgusta y malcontento. Trahadonan di Serlimar SG ta informa SEPPA cu nan a ricibi un carta di e fondo di pensioen APFA, caminda APFA informa nan cu Serlimar SG ta atrasa tres luna den pago di primanan di pensioen di e trahadonan di Serlimar SG y cu Serlimar SG a haya uitstel van betaling tambe pa e tres lunanan di prima di pensioen atrasa den e surseance van betaling definitivo.
Tambe APFA ta informa e trahadonan cu desde 19 di mei 2020 Serlimar SG ta pagando mensualmente e prima di pensioen di e trahadonan di Serlimar SG na APFA, pero cu APFA lo sigui monitor e pagonan di cu e compania mes mester haci.
Si dado caso Serlimar SG no sigi cumpli cu e pagonan di e pensioen premies di e trahadonan na APFA y Serlimar SG bolbe crea un atraso den e pago, APFA lo bay over na para e pensioen opbouw di e trahadonan di Serlimar SG y lo informa e trahadonan di Serlimar SG esaki por escrito.
E carta aki cu e trahadonan di Serlimar SG a ricibi di APFA a trece cune un disgusto grandi bou di nan y mas ainda e informacion suministra dor di APFA cu Serlimar SG ta atrasa tres luna cu e pago di prima di nan na APFA, mientras cu aña pasa gobierno y Serlimar SG a sinta hunto cu e fondo di pensioen di APFA pa regla e atraso aki di trahadoman di Serlimar SG cu Serlimar SG tawata tin cu APFA.
Pero ta indica cu Serlimar SG no a cumpli cabalmente cu a areglo cu Serlimar SG tin cu APFA y esaki ta causa cu e trahadonan di Serlimar SG ta hopi indigna y disgusta, pasobra Serlimar SG ta kita e placa pa e pensioen premies for di e salario di tur trahado di Serlimar SG tur luna, mientras 3 luna no a wordo manda na APFA.
Tin un otro asunto cu ta preocupa e trahadoman di Serlimar SG, esaki ta e reduccion di salario di 5% cu a tuma luga desde de mei 2020, reduccion di 50% riba vakantie uitkering y reduccion di 50% riba e toelagen di augustus y november 2020.
E pregunta di e trahadonan di Serlimar SG ta si e compania ta manda e suma cu a wordo retene di salario di e trahadonan di Serlimar SG na e instancia concerni y si no ta asina na unda esaki a bay.
Pa e motibo aki SEPPA a pidi prome minister den su carta un reunion urgente pa trata e dos puntonan menciona. Trahadonan kier haya claridad mas lihe posibel riba nan preocupacionnan cu tin nan hopi disgusta y malcontento.
