Awe mainta Sindicato di Aduana di Aruba (SADA) a ofrece un conferencia di prensa pa e medionan local pa aclaria varios punto pa lo cual ta trata nan punto di bista tocante rebaha di salario temporario di 5%.

Manera a keda conoci, siman pasa tabatin un manifestacion di otro sindicato cu a tuma luga y sindicato SADA desde aña 2015 ta un di e sindicatonan mas activo na Aruba, cu a mustra profesionalismo y cu a busca semper solucion na mesa. Na momento cu no tin un solucion mester rekeri pa otro pasonan cu ta wordo aproba of desaproba pa miembronan, asina a duna di conoce Edward Maduro. presidente di e sindicato.

Di mesun manera, el a señala cu tin un statuut den cual ta poni cu tur berstuur of sindicato tin cu haci, semper y cuando nan ta tuma un decision. Prome cos cu nan ta haci ta yama nan miembronan, pa asina den un reunion nan tuma e decision conhuntamente, pa motibo cu nan miembronan ta tuma e decision di na unda nan tin cu bay, Maduro a splica.

Pa via di esaki, e posicion di SADA a cambia y p’esey a yama un reunion extraordinario cu nan miembronan, pa puntra nan kico ta nan pensamento tocante esey pa motibo cu e decision a wordo desvia, pa locual conseho ministerial a presenta na luna di april.

Maduro a afirma cu miembronan di SADA a desaproba lo cual gobierno a haci bisando cu esaki ta Hulanda su decision pero den e punto aki nan no a wordo yama pa informa e sindicato cu Hulanda a bisa cu e rebaha di salario ta ‘tot nader order’ y SADA ta lamenta esey.

“No tin un excuus pa bisa cu no por yama sindicato pa informa”, Maduro a expresa.

Di mesun manera, el a laga sa cu miembronan a dicidi di no asisti pa un manifestacion na e momentonan aki, pero si informa pa via di e medionan local kico ta nan posicion. Ta bisa cu mirando e situacion di crisis cu nan ta solidario cu esunnan cu lo por of a perde nan trabou nan no a bay na un discusion riba e 5% of 50% cu a wordo presenta den conseho ministerial.

Maduro a duna di conoce cu locual nan a haci ta cu nan a pone condicionnan, miembronan a bay di acuerdo cu e 5% te cu dia 31 di december for di bezoldiging. Pero a presenta algun punto unda por ehempel algun pensionado cu ta funcionando como coordinador cu no ta ambtenaar y cu mester bandona e funciona pa motibo cu tin un crisis.

Di esaki, Maduro a comenta cu miembronan a presenta cierto condicion y algun pregunta cu te ainda nan no a haya ni un contesta di parti di gobierno. Ademas el a enfatisa cu miembronan no ta di acuerdo pa kita e 5% for di vast bezoldiging, pa motibo cu nan no tabata sa cu ora a kita for di vast bezoldiging e neto salario lo sufri un tiki, manera Maduro a sigura.

“Nos ta sinti cu nan ta hunga cu inteligencia, no solamente di pueblo sino cu tambe di esun di ambtenaar y loke ta mas erg ta cu nan ta hunga cu inteligencia di aduaneronan”, el a bisa.

“Ora cu nan a bisa cu esaki ta bay ‘tot nader order’ logicamente nos no por acepta esey pa nos pension bay sufri pa 30 aña.” E ora ey nan a dicidi cu no kier acepta esey y cu loke nan kier ta pa pone como un tipo di ‘solidariteit belasting’ den nan salario slip aparte di e bezoldiging cu mester keda intacto, pa asina scapa nan pension dependiendo di cuanto tempo esaki lo bira.

Ademas, Maduro tambe a specifica cu den e carta cu prome minister Evelyn Wever-Croes a manda dia 17 di april tocante recorte temporal den salarionan di empleado di gobierno – na unda ta señala cu gobierno no lo bay paga locual a wordo entrega na e momentonan aki – el a expresa cu nan no tin problema cu esey pero cu nan mester ta sincero. “Pakico nan no ta sincero pa pueblo”, el a comenta.

Igualmente el a duna di conoce cu sindicato a manda un carta pa nan miembronan unda nan a bisa cu nan no ta di acuerdo pa kita 50% for di pensionadonan. “Si gobierno aki kier ta transparente den crisis aki, cuminsa baha y publica salarionan di coordinador pasobra pensionadonan ni ambtenaar ta esun cu ta gana hopi placa”, el a menciona.

Pa finalisa, el a trece dilanti cu nan ta lamenta e hecho cu nan no a wordo informa di ‘tot nader order’ den mesa prome manera mester ta, pero kisas den futuro nan lo haya chens di bisa ‘tot ziens’.