Manera cu a keda anuncia desde siman pasa, sindicato SADA, a base di e reunionnan cu nan tabata tin cu su miembronan, a reuni cu Minister di Financia, Sr. Angel Bermudez, riba nan puntonan di preocupacion. Segun Edward Maduro, presidente di e sindicato, ta trata aki di puntonan cu tabata drumi riba mesa of cu no a wordo realisa, desde e diferente reunionnan cu nan a tene.
E reunion aki a tuma luga diaranson atardi y for di eynan a combersa riba e puntonan cu ta andando cu ta pega, cu no ta mira cu ta wordo realisa y no tin movecion riba nan. Puntonan cu a reuni pa varios biaha cu minister y cu minister mes a haya straño cu ainda nan no a wordo realisa. Esey ta un di e partinan di e reunion
Algun di e puntonan
Un di e puntonan sigur cu a trata durante e reunion aki ta e situacion di arma. Maduro a splica cu na november e coleganan na Barcadera a sali debi na e situacion caotico cu tin eynan. E coleganan ta bogando pa ta arma pa hopi tempo caba. Tin hopi tempo ta reuniendo riba esaki y minister a duna comprension pa e banda eynan, pasobra e ta wak cu nan tin base pa pleita pa esaki y te awor aki februari, nada no a tuma luga. E situacion riba waf ta caotico, insigur, no tin control debido di parti di e porta, unda cu tin cu subi e tereno di waf y esey ta pone cu e coleganan cu ta eherciendo nan trabao, por sali perhudica di esaki. E minister mes a cuestiona ta dicon ta wardando pa duna arma, mirando cu den caso di carga humano, nan ta bay den accion constantemente hunto cu otro departamentonan.
E coleganan aki, segun Maduro, ta uza e armanan cu tin disponibel na Barcadera y nan tin e entrenamento y destresa necesario pa por fungi den casonan asina.
Awo ta keda na e director pa tuma decision pa caba y pa laga nan cuminsa carga arma riba Barcadera.
Mas punto di discusion
Tin mas punto manera uniform, situacion na aeropuerto mes, caminda cu e oficina ta den un situacion practicamente deplorabel y SADA ta mirando cu esaki no ta bay ni dilanti, ni patras.
E puntonan ey a wordo treci na atencion di e minister un baha mas, caminda cu el a avisa cu e lo bay papia cu e director. A palabra durante reunion cu minister cu e lo manda yama e sindicato pa un reunion tripartiet hunto cu director. A pidi pa e minister pa pone un timeframe riba cada punto pa wordo realisa, pasobra a reuni suficiente. Awo e minister lo bay trece e puntonan aki dilanti na e director, pa despues, ora ta asina leu, invita e sindicato pa bin sinta hunto pa asina discuti y mira na ki solucion por yega na esakinan.
