Tin indicacion cu un grupo di trahado di aeropuerto y malcontento cu sindicato STA lo kier lanta un sindicato nobo. Ya caba nan a cuminsa manda algun formulario cu aparentemente no a cay den bon tera cerca dirigentenan di STA.
Ayera den combersacion cu Bon Dia Aruba, presidente di STA Diego de Cuba a bisa cu actualmente e trahadonan di aeropuerto ta gosa di un di e miho contracto colectivo (CAO) na Aruba. E ta un CAO cu a drenta na vigor na januari 2016 y e tin un duracion di 4 aña te cu december 2019. Segun e veterano sindicalista e CAO aki ta yen di beneficionan pa e trahadonan di aeropuerto cu nan no tabatin of cu nan a yega di perde prome cu nan a afilia na STA. P’esey e ta convenci cu si nan ta bay pa un referendum pa representa e mayoria di e trahadonan di aeropuerto, STA ta gan’e.
E no ta haya cu tin motibo di malcontento cerca e trahadonan di aeropuerto. Solamente “e ignorantenan” cu no ta reconoce e trabou desplega pa STA durante e ultimo añanan ta purba di afecta e pas laboral cu ta existi den aeropuerto, segun De Cuba. Actualmente STA tin 112 miembro di un total di 140 trahadonan cu por bira miembro.
STA su preocupacion mas grandi ta cu e trahadonan cu no ta consciente di tur e logronan alcansa lo wordo mal informa. El a manda na Bon Dia Aruba un compilacion di e logronan alcansa pa STA na beneficio di e trahadonan di aeropuerto for di 2009. Actualmente STA ta representa e trahadonan di ANSA N.V cu ta e compania cu ta atende cu e toren di control den aeropuerto, y Inmigracion tambe. Un par di e logronan ta cu pa empleadonan cu ta traha warda esta 11 dia extra di sosiego pa tur esunnan cu ta traha warda. Tambe a hisa e compensacion di personal di warda: di 180 florin pa 3 warda y awor e ta 500 florin pa 3 warda y 2 warda di 120 florin pa 350 florin.
Apelacion
E sindicalista De Cuba tambe kier recorda e trahadonan di Triple A, cu e compania cu a opera den aeropuerto tambe tabata miembro di STA, pero pa mal maneho di e directora e compania a keda mal para financieramente cu un debe grandi y sin paga nan compromisonan social manera belasting, AOV, SVb, AZV, etc.. E ta bisa cu e tempo aya nan a pidi e trahadonan afilia na STA comprension; pero nan a bay afilia cu otro sindicato. E consecuencia di esaki tabata ta cu CAO cu nan tabatin prome cu bon componente y beneficionan secundario entre nan placa di vakantie, bonus di fin di aña, aumento general, placa di warda… pero despues di 3 aña nan a perde tur cos.
E ta haya cu si tin algo cu ta molestia e trahadonan di aeropuerto, nan por acerca sindicato STA pa expresa nan malcontento. “Bo no por bay tras di lomba di bo sindicato, anto bay fomenta yen di cosnan straño, sin consulta cu e sindicato”, segun presidente di STA.
