Lider sindical di FTA, Hubert Dirksz a rechasa cualkier critica si gremio sindical tabatin un rol pasivo y complaciente durante e delaster 8 aña di gobernacion. Y si esaki tabata eventualmente un factor cu ni gobernador ni formado di gobierno a reuni cu nan despues di eleccion.
“Cu e sindicato a keda keto:No!. Mi no ta kere esey”, enfaticamente el a bisa.
Segun sr. Dirksz, sindicatonan a actua den diferente asunto. Un ehempel cu el a trece dilanti tin di haber cu Sindicato di Cuerpo di Aduana (SADA) cu a confronta diferente problemanan. Tambe el a bisa cu tabatin otro sindicatonan cu a sa di confronta cu otro problema cu gobierno. Te hasta nan mes como sindicato FTA a confronta problemanan cu e gobierno saliente.
Sinembargo e ta haya cu hopi biaha ‘bay mesa mester tin un solucion. Pero bay mesa no tabata e solucion’. E ta analisa cu bay mesa talbes tabata un metodo pa silencia e asunto, hacie mas largo, sin haya solucion. Lamentablemente esey a pasa y e ta spera cu lo por bin un desaroyo miho, no solamente con pa atende e problemanan, pero tambe den e gremio sindicato mes. Igualmente seriedad di e gremio di e dunadonan di trabou ta importante.
E dunado di trabou no por exigi y wak placa so segun FTA pasobra si nan ta wak un desaroyo social cu ta bay malo y otro problemanan social cu ta den mal direccion, nan no por neglisha nan. A pesar cu e reto financiero ta grandi, te hasta talbes pa algun comerciantenan cu ta pasa den situacion dificil, pero presidente di FTA ta haya cu si nan no ta atende cu e problemanan aki di un manera serio, na final nos tur ta sali perhudica.
Dialogo social
El a bisa cu niun momento e principionan sindical a bay perdi cu e Dialogo Social cu a tuma luga, unda varios decision grandi a wordo concretisa. Presidente di FTA ta haya cu loke a tuma luga cu e Dialogo Social tabatin su efecto positivo, pero di otro banda su efecto negativo. “E dialogo social no a bay manera cu e mester a bay”, el a bisa.
Pero na momento cu bo ta den un dialogo segun e sindicalista hopi biaha bo ta atende un parti di e problema y no necesariamente loke ta e problemanan. E ta reconoce cu e metodo of forma cu a wordo uza den e dialogo social no tabata e miho. Ademas loke hopi biaha a wordo aproba no a wordo cumpli cu nan. “E gobierno a dicidi pa kies loke ta e fruta dushi so y laga esun zuur”.
Un punto tabata criminalidad caminda e gobierno anterior ta defende su mes bisando cu nan a haci algo, pero te awe e cifranan ta mustra cu ‘criminalidad ta den hopi mal direccion na Aruba’, el a bisa. Presidente di FTA ta argumenta cu no ta cuestion cu sindicato no a bisa nada riba e situacion di criminalidad, ya cu den varios ocasion nan a yega di critica e problema aki.
“Nos a haci suficiente”, el a declara. Pero e ta haya cu si nan tabatin miho metodo y sindicatonan mes den un miho coordinacion y preparacion pa atende cu e problemanan, otro cos tabata ta awe. Pero tambe e seriedad di e dunadonan di trabou, tur e cosnan aki lo por a contribui cu talbes awendia nos tabata den un situacion mas leu den e lucha contra criminalidad.
