Sindicato IOWUA ta preparando pa bay ‘all the way’

Presidente di sindicato IOWUA (Independent Oil Workers Union of Aruba), Boy Anthony, a dicidi di kibra su silencio pa vocifera e preocupacion cu ta existi rond di e grupo di trahado di refineria y terminal.

E grupo keto bay a bira menos despues di e embargo y tur e problemanan cu esaki a trece pa Citgo Aruba. Pero e temor ta cu e grupo lo bira mucho menos. Specialmente despues di e MoU (Memorandum of Understanding) cu a wordo firma entre Refineria di Aruba (RdA) y Citgo.

Mas claridad.
E sindicalista Anthony tabata prudente pa no papia di accion cu por afecta e suministro di combustibel y jet fuel, mirando e impacto cu esaki lo por trece pa nos economia. Pero si nan ta evaluando un eventual caso den corte. “Nos ta preparando pa bay all the way,” el a bisa. Kiermen si nan kier bay den paz of nan kier bay ‘con nan kier.’

Sindicato IOWUA ta haya cu despues cu e MoU a keda firma, nan a duna gobierno y RdA suficiente espacio pa negosha, mustrando nan bon boluntad, pero ta yegando e momento cu mester claridad. “Nan a bisa nos cu trahado ta prioridad. Wel, awor a bira tempo pa nos wak kico ta prioridad”, segun Presidente di IOWUA.

Anthony a declara cu e problema ta e falta di transparencia. Pasobra si un MoU a wordo firma cu tur parti envolvi y cu e team negociado, e ta haya cu a yega tempo pa nan sa con lo para cu e trahadonan. IOWUA a comunica cu nan abogado y tambe cu minister di Labor, Glenbert Croes, pasobra nan no ta bay permiti cu nan ta bay pasa un fast ball. E sindicato kier pa djis nan por cumpli cu locual a wordo priminti. E ta haya cu como trahadonan si nan a cumpli ya cu tin gasolin, jet fuel y diesel, mustrando cu nan ta trahando di buena fe.

Anthony a bisa cu semper e ta pro di dialogo pa busca un solucion. Nan a yega di tuma contacto cu gerencia di Citgo pa wak si nan ta prefera pa regla nan diferencia na mesa of bay corte. Nan kier haya e mesun areglo cu e trahado cu a bay a bin hay’e, te hasta esun di 2019. Pues nan no ta spera menos cu esey, pasobra den nan contracto colectivo (CAO) ta para ‘no discrimina.’

Apesar cu e no ta nenga cu como sindicato nan tin bon contacto, nan mester claridad. Den e reunionnan cu a yega di tuma luga cu gobierno, minister di Labor, director di departamento di Labor, Mediador di Gobierno, pues cu henter team negociado, IOWUA representa pa nan Abogado Chris Lejuez a yega di discuti riba diferente punto.

Cuanto ta bay keda?
Gobierno su punto di salida ta cu CITGO tin cu paga e trahadonan cu ta bay. Pero tambe na e contratistanan y personal di staf. Despues RdA por tuma e trahadonan cu ta keda den servicio. Anthony ta consciente cu tur hende sa cu no tur hende ta bay keda. Pero e problema ta cuanto ta bay keda? E ta haya fastioso cu dificilmente bo por bisa un cifra, sin hustifica e cifra di trahadonan cu mester keda.

Aworaki ta wordo papia entre 40 pa 45 trahado di un grupo di 76 trahado cu ainda ta keda operando particularmente e terminal di combustibel. IOWUA no ta di acuerdo cu un reduccion di e caliber aki.

Anthony kende no solamente ta un lider sindical sino un trahado veterano di e refineria, ta haya cu tin diferente factor cu ta demanda cu mester di mas trahado. Por ehempel pa mara un barco so nan mester di cinco hende. Ainda tin e tankinan pabou cu aunke no tin cliente ainda, pero tin producto den e liñanan cu lama por wordo contamina y nan mester controla. Tambe tin trahadonan cu mester bay cu vakantie, training y tambe esunnan cu por ta malo.

E ta haya cu mester tene cuenta cu tur e factornan ey, prome cu nan ta determina cierto cantidad di trahado pa garantisa e siguridad di infrastructura di e terminal y di refineria. Pero principalmente e siguridad di e trahadonan y di nos medio ambiente. “Bo mester tin esey na cuenta,” asina categoricamente Anthony a bisa.

Otro punto importante pa IOWUA como sindicato cu ta sali na defensa di e trahadonan tin di haci cu e areglo di pago di e trahadonan cu ta bay.

Na 2016 ora cu CITGO a drenta den e refineria tabatin discusion riba pago di areglo y beneficio laboral cu te hasta nan mester yama Valero pa bin na mesa, pasobra nan kier paga e trahadonan menos. Pero den nan acuerdo, esey no ta posibel. Tambe CITGO den su polisa ta para cu niun trahado no por bay atras di nan salario y beneficio adkiri. Ya cu nan trabou y responsabilidad ta keda mesun cos. Si no tin cliente, nan no ta haya cu ta falta di e sindicato. Ademas nan tin un contracto colectivo vigente pa cuater aña te cu 2021, cu tanto sindicato IOWUA como e compania a firma.