Tur cos ta indica cu e negociacion entre gerencia di CITGO Aruba y nan trahadonan, representa pa nan respectivo sindicato, ta conociendo un final. Ayera CITGO a bin cu un pakete di retiro mas atractivo cu sindicato IOWUA (Independent Oil Workers Union of Aruba) a bay p’e.

Sindicato IOWUA a acepta e pakete cu gerencia di Citgo a ofrece na e trahadonan pa asina cera nan relacion di trabou. “Ma bisa gerencia cu IOWUA cu su hendenan ta bay acept’e,” presidente di IOWUA, Boy Anthony a informa na Bon Dia Aruba. Sinembargo el a bisa cu den bida, bo no ta haya tur loke bo kier. Pero e ta un bon pakete definitivamente.

No ta conoci si e otro grupo di trahadonan a dicidi di acept’e tambe. Despues di un reunion cu gerencia di CITGO, Anthony a informa cu nan lo acepta e pakete cu e compania a ofrece, pasobra e ta un bon pakete. E sindicalista ta haya cu e logro aki ta hopi importante pa e trahadonan, pasobra actualmente nan no sa ken ta bay keda cu trabou y ken ta bay. “Locual ma negosha na februari, esey ta wordo paga,” el a bisa.

E ta e mesun pakete cu CITGO a yega di ofrece na e trahadonan cu a sali for di refineria na februari ultimo. E sindicalista a bisa cu e pakete aki ta mucho mas faborabel, tres biaha mas di esun cu CITGO a ofrece recientemente.

IOWUA ta representa e mayoria di e trahadonan di e refineria y terminal di combustibel. Den e caso aki, Anthony a indica cu CITGO no por a bay contra ley. Pues e ta reitera cu e ta un bon pakete y su conseho pa e trahadonan ta pa tum’e, pasobra niun hende sa si lo keda cu trabou of no. Pero a lo menos cu e pakete aki nan sa cu e trahadonan por paga nan debenan.

Asina e ta haya cu ta wordo cera e prome fase di e proceso aki. Awor lo bini e segundo fase cu ta encera cual compania lo tuma over e refineria y e terminal, y cuanto trahadonan, nan ta bay tum’e si of no. Riba e parti aki, presidente di IOWUA ta haya cu e no tin competencia riba e decision aki. E ta un decision cu mester wordo tuma pa esun cu ta bay tuma e operacion over. E no sa si ta gobierno of otro compania interesa.

Presion.
Manera ta conoci, tur e trahadonan y nan respectivo sindicato, FTA y IOWUA, sin excepcion a rechasa e oferta of pakete cu Citgo a pone ariba mesa dia 27 di december ultimo.

Den e carta cu Citgo a manda, nan a ofrece pa paga tur trahadonan nan añanan di servicio di acuerdo cu e leynan di cesantia, mas dos luna di compensacion y nan dianan di vakantie, etc. Esaki a conduci cu IOWUA a eherce un presion internacional, mandando un carta pa USW (United Steelworkers). IOWUA ta afilia na USW hunto cu e demas sindicatonan grandi cu ta representa casi tur e refinerianan na Merca, entre nan Citgo.

USW ta un di e sindicatonan mas grandi di Merca. Pero di otro banda, tambe nan a manda un carta pa prensa Mericano, cu ta interesa riba e asunto aki.

Un cos cu sindicato IOWUA a bin bon cla cune, caminda e sindicato a yega di expresa gobierno, y particularmente na minister di Labor, Glenbert Croes, tabata cu Citgo Aruba Refinery (CAR) no por bay ‘zomaar’ di Aruba dia 31 di januari awor, sin cumpli cabalmente cu su compromisonan cu e tin cu su trahadonan y cu pais Aruba.

E presion riba Citgo aparentemente a haci su efecto cu nan a dicidi di bin cu otro pakete di retiro mas diki, prome cu nan ta bandona Aruba. Den e lucha aki, tanto IOWUA y FTA – cu ta e sindicatonan cu ta representa e personal hunto cu halto gerencia local – a uni forsa pa presiona CITGO.

Si IOWUA y eventualmente FTA cu ta representa e trahadonan di staf y e team di manager local ta acepta e pakete aki, e capitulo di CITGO den historia di Aruba su refineria ta practicamente cera. Aunke ainda ta pendiente otro compromisonan cu e compania aki tin a base di e acuerdo cu a wordo firma cu pais Aruba.