Sindicato di trahadonan den refineria, IOWUA, a comenta riba e acuerdo cu Citgo Aruba a firma cu e contratista Frances Technip pa drecha e refineria. Sinembargo nan ta mira cierto cosnan cu ta haci cu nan kier sinta riba e condicion laboral insigur.
Nan ta mira cu tin actividadnan riba e tereno di refineria cu por causa peliger. Tambe e sindicato ta mira trahadonan den servicio di Venezuela cu ta gana un suma hopi abou, mientrastanto trahadonan local por haci e trabou aki. Pa motibo di esey e sindicato lo bay reuni cu su miembronan riba e puntonan aki.
E presencia di e compania Frances, cu ta lidera un consortio di companianan, entre nan tambe un compania Venezolano, no ta un problema pa IOWUA, segun lider di e sindicato aki, Boy Anthony. “Si nan a haya e contract bon pa mi.” E ta laga sa cu nan tabata na haltura di e proceso aki, te hasta tabatin otro compania interesa prome cu esun di Francia a gana e bid, ya cu basicamente tur trahado di Aruba interesa pa traha den e refineria ta wardando pa cuminsa traha, ya cu te aworaki no tin mucho movecion.
Loke si e sindicalista a indica ta cu e ehecutivonan of esunnan cu ta representa Tecnip, mester papia Ingles. Pasobra a base di experencia propio den pasado cu otro compania Frances cu a bin realisa trabou na WEB, nan tabata asina arogante cu Frances so nan tabata papia. IOWUA ta spera cu gobierno bin cu e exigencia cerca nan cu Ingles nan tin cu papia na Aruba.
Otro punto relaciona cu compania di afo cu ta bin opera riba nos isla tin di haber cu na Aruba nos tin nos propio ley, y nan ta esunnan cu mester adapta nan mes na nos legislacion. Asina e lider a expresa su mes.
