Sindicato IOWUA cu ta representa e trahadonan di e refineria cu a traha pa Valero a sostene nan di dos reunion cu Citgo su representante legal. E prome reunion no a bay bon y e di dos reunion cu a tuma luga ayera a bay menos mal cu esun prome.
Presidente di IOWUA, Boy Anthony ta bisa Bon Dia Aruba cu un biaha pa luna, nan ta reuni cu gerencia di Citgo y tambe cu director di Refineria di Aruba (RdA). E meta di e tipo di reunion aki ta precisamente pa resolve problemanan y atende cu e derecho di e trahadonan cu ta gosa di un contracto colectivo (CAO); y tambe di un polisa di e compania. E reunion aki ta busca cu tanto e CAO como e polisa ta wordo respeta tanto di parti di e companianan como di e trahadonan. “Si tin problema nos ta resolve na mesa. Esey ta evita cu bo ta haya caso den corte”, e ta bisa.
Reunionnan
E di dos reunion entre IOWUA y RdA a bay “basta bon”. Pero e prome reunion entre IOWUA y Citgo “no a bay di e bon ey”, asina e sindicalista a bisa. Ta asina cu sr. Anthony a manda un carta pa gerencia di Citgo Aruba pa splica nan pa kico e reunion no a bay bon pa nan.
Ayera un biaha mas dirigentenan di IOWUA a reuni cu abogado di Citgo, sr. Corredor y nan a discuti kico no a bay bon den e prome reunion y nan a trata e puntonan aki. “Awe el a bay hopi bon!”
Sindicalista Anthony ta laga sa cu nan tin comprension cu gerencia di Citgo, pasobra pa nan e proceso aki pafo di Merca ta nobo. “Mi kier duna nan beneficio di duda, pero semper y cuando cu nan ta respeta nos ley laboral, nos CAO y nos ley Hulandes cu no ta ley di Merca, e ta un tiki otro.”
Segun sr. Anthony un di e puntonan tin di haber cu palabracion cu nan tabatin cu Valero y cu tabata andando y cu casi tabata cla. Citgo kier adapta nan di otro forma cu pa IOWUA ta inaceptabel, ya cu e acuerdo cu nan tin ta un continuacion di e derechonan y beneficionan cu nan a adkiri cu Valero.
E ta reconoce cu na mesa nan por resolve problema y e reunion di ayera a “bay miho”. IOWUA ta percura cu e proceso di transicion por cana normal cu e plannan cu nan tabatin riba vehiculo, siguridad, medio ambiente, etc..
Trahadonan
Di e trahadonan afilia na IOWUA, un grupo a bay traha cu e compania estatal nobo, Refineria di Aruba (RdA). E compania aki a hereda e servicio cu Valero tabatin di abastece di combustibel e pomp station y e terminal aereo.
E di dos grupo a bay over den e refineria na servicio di e operador nobo Citgo. E sindicalista Boy Anthoy a bisa cu den e traspaso aki Citgo a tuma e trahadonan di Valero over. E ley laboral di Aruba cu ta “lusten en lasten” y tin ley di successorship, caminda e trahadonan no ta perde e derechonan y beneficionan cu nan a adkiri durante nan añanan di trabou den e refineria, aunke e tin aworaki otro operador nobo.
