Sindicato SIMAR a institui un comision special pa asina tur scol, segun nan a resta 28, haya airco y gymzaal.
Nan a yama un reunion cu miembronan y no miembronan cu ta traha den lokaalnan di scol cu no tin airco anto a lanta un comision aki. E reunion a tuma luga durante e dianan cu tabata hopi calor, na mita di september. E comision su meta ta pa busca diferente manera con pa yega na logra tin tur scol cu airco y tambe un espacio pa gymnastiek. Ayera durante nan prome rueda di prensa como comision – cu T-shirtnan cora skirbi ‘Sodando y Calor un echo, Airco nos derecho’ nan a elabora riba nan meta y pakico a start esaki aworaki.
“E reunion a bin na momento cu no tabata hayando ningun decision concreto di parti di directivanan di scol ni minister pa por a sa kico lo pasa cu alumnonan y trahadonan relaciona cu e calor,” Maroeschka Cornelie di Sindicato di Maestro di Aruba (SIMAR) ta bisa. E comision Airco pa tur scol a wordo lanta cu e meta pa busca diferente forma pa trece dilanti na e siguiente gobierno e importancia di tin airco na tur scol di Aruba. “Simplemente pa tur scol tin airco y pa tur scol tin sala pa haci gymnastiek sea cu dak of no. Pasobra nos tin tambe hopi docente cu ta trahando mas di shete ora den mas cu 31 grado Celsius den e solo ey. E meta ta pa tur hende ta sigur.” E trabao aki ta bin a base di ley segun sra. Cornelie. Tin ley cu ta bisa claramente cu un trahado mester ta sigur na pia di trabao señalando tambe tur detaye den ki tanto grado e mester traha. “Tur esaki ta e base cu e comision ta bay traha riba dje pa exigi pa ley wordo cumpli cu maestronan di scol tambe.”
Cambio di clima
Segun un sondeo cu nan a haci, tin entre 80 cu 90 scol na Aruba di cual mas o menos 28 no tin airco actualmente. Kiermen e ta un cantidad relativamente abao. Claro e costonan ta grandi pero nan ta kere cu esaki no lo ta algo imposibel. Di e 28 scolnan aki sin airco, algun ta parcialmente caba cu airco cu a haci riba nan mesun costonan. “Maestronan di scol a traha pa hopi aña den e situacion aki. Awendia nos tur sa e cambionan di mundo, e cambionan di clima y ki efecto nan tin riba nos. Na Aruba nos tur por sinti e calor cu ta abnormal. Nos a bisa cu a bira tempo pa cuminsa exigi pa esaki no bay asina mas.”
E comision ta di opinion cu e tempo cu e scolnan a wordo construi, e clima tabata aceptabel. Pues p’esey no ta tur scol den transcurso di tempo no a instala airco. Sinembargo esun cu ta consciente sa cu e clima no ta mescos segun sra. Cornelie, cual ta hacie mas cu claro cu mester bin cambio pasobra no por sigui asina. “Como miembro di directiva di SIMAR, pa mas cu ocho aña largo esaki ta un punto cu semper a bin dilanti. Y banda di esey tambe semper nos a boga pa trato igual pa tur scol. Gobierno ta trata su scolnan diferente, e ta duna nan material y cuido na un forma diferente cu esunnan cu ta wordo subsidia.” El a sigui splica: “Un di e puntonan cu SIMAR semper a boga pe ta pa hisa e cifra cu ta wordo uza pa calcula gastonan di cada alumno. Y esey ta mas cu dies aña nos tin ta tende esey. E ponencia cu Simar pa ocho aña nunca a haci nada mi ta haya asina pret. E no ta berdad.”
Accion di firma
E comision a cuminsa cu un accion di firma. Nan ta purbando di yega un 65% di e cantidad di docente rond di Aruba pa firma pero sigur lo kier e 100%. E accion di firma a cuminsa 9 di october anto e veld completo a brasa e accion aki. Pues ta masha tiki maestro di scol no ta di acuerdo cu esaki segun sra. Cornelia. “Awor aki locual e comision ta bay haci ta conscientisa e publico, coleganan y tur hende riba e importancia di tin airco. Awor nos ta papia cu airco no ta un luho of necesidad, pero un exigencia.”
E intencion ta pa colecta e firmanan aki y entrega esaki na e ministernan concerni ora cu yega asina leu.
No a lanta den conexion cu politica
E comision a enfatisa tambe cu nan no a lanta a base di ningun bahamento di gobierno ni subimento di gobierno nobo. E no tin nada di haber di ningun partido politico y ta traha independiente di tur esey. “Simplemente el a lanta na un momento cu gobierno ta cambiando. Pero e tabata mas liga na e clima.”
E comision a tuma nota cu diripiente algun dirigente di diferente scol a tribi di intimida coleganan por medio di priva nan di firma y esaki no ta aceptabel. E comision ta laga sa cu esaki ta un accion positivo cu nan ta kere tur hende ta di acuerdo cu e mester tuma luga. Sra. Cornelie: “Nos tur ta consciente cu no ta den dos dia tur scol lo por haya airco. Tin hopi factor cu lo mester traha na nan. Pero nos tur ta di acuerdo si cu e mester tuma luga di un manera of otro. E meta ta pa e siguiente gobernacion tin esaki manera un top prioridad na halto aya.”
