Diabierna mainta sindicato FTA (Federacion di Trahadonan di Aruba) hunto cu trahadonan di RBC Royal Bank a tene un accion di protesta pafo di e edificio di e banco caminda Sr. Hose Figaroa, president di sindicato FTA a duna splicacion ariba e situacion y preocupacion di e trahadonan di e banco.
Segun Sr, Figaroa a splica, sindicato FTA a yama e accion di protesta bou di e trahadonan di RBC Royal Bank debi na e hecho cu un biaha mas e trahadonan di e banco a wordo confronta cu un decision na unda cu un biaha mas e banco ta bin cu peticion pa reduci personal. Segun Sr, Figaroa ta señala e situacion aki ta uno cu ta andando pa algun aña caba unda cu poco poco gerencia di e banco ta tuma decisionnan, eliminando departamentonan, locual ta hiba na su turno na un reduccion di personal.
El a splica cu e biaha aki a wordo anuncia di parti di gerencia cu un otro departamento, atrobe, lo wordo saca for di Aruba y lo wordo manda pa Trinidad. Esaki sigur ta afecta un cantidad basta grandi di trahado cu ta laborando den e departmento specifico na RBC.
“Logicamente esaki a trece e conmocion necesario cune. Uno, no solamente pasobra ta trata di un grupo di trahado, den un temporada cu no ta e temporada mas facil cu nos conoce, ta haya su mes confronta cu probablemente e ta bay ta perdiendo su empleo, pero e decisionnan aki no ta afecta solamente e grupo cu ta bay, pero e ta afecta tambe e grupo cu ta keda”, Sr. Figaroa a indica.
El a splica cu cada biaha e banco ta reduci personal pero e cantidad di trabou cu tin cu wordo haci apenas ta cambia y esey ta duna como resultado cu poco poco e presion ariba e trahadonan ta keda tambe ta subi di un forma hopi pisa. “Na cierto momento e ambiente na trabou no ta di un manera mas cu bo por traha di un forma adecua, pasobra e presion simplemente ta bira demasiado halto y esey ta bisto tambe na momento cu mira e cantidad, e numbernan di personanan cu ta AO ta aumentando di un forma drastico”, el a bisa.
E president di e sindicato ta splica cu e trahadonan simplemente a cansa y no por mas cu e situacion. Pa e motibo ey nan a scoge pa hiba un mensahe hopi cla pa gerencia di banco, unda cu nan ta demostra cu nan no ta di acuerdo cu e manera di maneho di e gerencia cu ta scoge pa saca trabou di Aruba y manda pa otro paisnan unda cu e banco ta estableci y asina haci e situacion di e trahadonan aki na Aruba cada bes mas dificil.
E sindicato tambe a haci entrega di un carta oficial unda cu nan ta menciona por escrito tur e puntonan y motibonan di preocupacion y desacuerdo. Na mesun momento a propone un reunion pa dialuna 4 di october cu e gerencia di e banco pa yega na palabracionnan concreto unda cu ta garantisa no solamente e cuponan di trabou pero tambe ta garantisa cu e trahadonan tin un ambiente di trabou unda cu nan no tin presion tanto fisico como mental cu ta relaciona na e manera cu nan mester eherce nan trabou.
Un di e puntonan cu e sindicato y e trahadonan di RBC Royal Bank kier trece pa dilanti posibilidad di no elimina e trahado pero e posibilidad pa schuif e trahado den e organisacion mes. El a enfatisa cu esaki no ta e miho momento pa bo busca trabou, y aunke facilmente por bisa cu tin hopi trabou eyfo, pero esakinan no ta trabounan cu ta paga ni den beneficionan primario ni den beneficionan secundario cu ta locual un banco ta paga.
Segun Sr. Figaroa a splica un parti di e problema ta cu e banco ta acerca e trahadonan di e departamento cu lo wordo elimina cu paketenan di retiro pa nan scoge si nan ta tuma esaki of no y e parti di preocupacion grandi cu ta bin di e situacion ey ta cu tin un grupo, cu pa motibonan personal ta eligi pa si tuma un pakete y bay cas, y esey como resultado ta laga e grupo cu ta keda cu lo mester eherce trabou extra. “Mirando cu e cantidad di trabou ta keda mescos y hopi biaha temporalmente ta elimina trabou pero ta resulta cu e trabou ta bin back despues, e grupo chikito cu ta keda ta haye den un presion enorme pa por eherce su trabou”, el a bisa.
Pa locual ta trata e departamento spifico cu ta wordo elimina ta e departamento di call center, cu ta wordo manda pa Trinidad. Sr. Figaroa ta enfatisa cu Aruba su trahadonan ta miho ekipa pa maneha e call center mirando cu Aruba su trahadonan ta domina cuatro idioma. “Na momento cu bo manda e call center pa Trinidad bo ta haya hendenan cu ta papia Ingles, y un Ingles cu hopi biaha no ta totalmente comprendibel y e resultado di esey ta cu si eynan nan no por yuda e cliente nan ta mande pa Aruba toch”, el a bisa.
Mientras cu e departamento aki a wordo reduci practicamente completamente, el a indica cu e poco trahadonan cu a keda, e presion di trabou ta aumenta drasticamente riba nan. “Esey no ta un manera di hiba un maneho sano pa un empresa anto e argumento cu tin biaha bo ta tende ta cu e trahado na Aruba ta mas caro, pero si un trahado na Aruba ta miho ekipa, e calidad di trahado ta mas halto y logicamente pa un miho calidad di trabou bo tin cu paga mas”.
Segun e president di e sindicato a indica, e hecho cu e trahado ta ricibi of no overtime no ta hustificacion pa duna e trahado mas trabou, specialmente si ta exigi e trahado pa eherce su trabou normal, y e extra trabou adicional, den e mesun ocho oranan di trabou.
El a expresa cu e situacion di trahadonan ta uno di abuso laboral. “E trahadonan di e banco ta sinti cu nan no ta wordo respeta y cu e ta wordo abusa y na cierto momento bo no ta respetando e derechonan di e trahado. Un trahado ta dispuesto pa traha pero bo no por haci mal uzo di e disponibilidad di e trahado tampoco”
