4july,SL, Hubert Dirksz (1).jpg

Sindicato FTA (Federacion di trahadonan di Aruba) ta conta di e lucha cu tin cu hiba ora cu compania bandona un pais, y kico ta pasa cu e trahadonan. Aki mester tin yudansa di sindicato, abogado y gobierno.

 

President di sindicato, Hubert Dirks a duna di conoce cu e presion cu a pone riba compania internacional encarga cu Citgo a logra pa yega un pago mayor di locual e trahado a wordo ofreci na december.

E ta duna di conoce e situacion cu a yega na un decision di bancarota y simplemente bandona e isla y laga tur hende atras. Un punto cu a menciona ta cu mester implementa un sistema cu manera un inversionista yega Aruba y ta establece cu a pone un cuenta na Banco Central, cu ta deposita un suma di placa cu ta garantisa un cantidad di pago pa e trahado y pa cuanto tempo.

Nan ta spera cu situacion asina no ripiti y cu lo prepara, pa no ta asina vulnerable. “No den caso di Citgo”, pero sigur e ta keda depende di inversionista di exterior, y no cu simplemente e compania ta bay laga e trahadonan.

E ta bisa cu ta keda na politico pa tuma e decision y pone un sistema na luga. Anto si pone e ley, mester pone den practica pa ehecuta den caso cu trahado ta wordo perhudica cu solamente ta ricibi cesantia, sin proteccion cu lo haya un suma mas grandi cu lo yuda e trahado na su momento di perdida di trabou, situacion dificil p’e y su famia.

Nan ta pensa esey ta un bon manera pa evita situacion asina presenta. Den e caso di Citgo cu a bandona e pais, e ta bisa cu no a cumpli cu e compromiso cu tabatin cu empleadonan. Pa e motibo aki a tene reunion y pone presion na nivel internacional, cu intencion pa nan paga.

Sinembargo nan a bisa cu nan no tin fondo pa paga esaki.

Pa e motibo aki, sindicato FTA ta haya cu mester tin proteccion pa situacion asina no ripiti. “Den todo caso si no tin proteccion of ley, automaticamente ta laga espacio habri.”

Pa locual ta trata e ultimo desaroyo pa locual ta parti di operacion, el a menciona cu e terminal pa suministro di gasolin pa Aruba mester continua.

“Pa cualkier compania tuma over awo, ta momento pa Citgo termina su relacion cu pais Aruba.”

Ora un compania tuma over, e ta tuma trahadonan tambe. Dirks ta bisa cu sa cu ta parti den dos terminal, caminda e tanki ta; pero tambe e refineria cu ta den un estado deplorabel. Pero ta keda e termino cu ta spera cu por haya inversionista cu ta bay inverti den algo asina y yega na un renobacion. “Cu intento nobo, si algo cu ta duna trabou na nos hobennan riba e tereno aki’ cu lo por duna bon salario y yuda e parti financiero di pais Aruba.