Ayera tanto gerencia di Tele Aruba como presidente di FTA acompaña cu nan respectivo abogadonan, a reuni cu mediador di gobierno pa atende cu e situacion di un grupo di trahado cu kier haci uzo di nan derecho laboral pa afilia na sindicato. Pa diabierna nan lo reuni bek pa dicidi si FTA ta wordo reconoci door di gerencia di Tele Aruba, sin mester pasa den proceso di un referendum.

Ya caba Bon Dia Aruba a referi siman pasa na e situacion cu ta reina den e planta nacional di television. E motibo di nan disgusto ta varios, entre otro desigualdad di salario. Nan salario ta varia masha hopi entre nan mes te hasta pa hendenan cu ta realisa e mesun funcion den e mesun departamento. Pa colmo ora cu e trahadonan ta papia di mehoracion di salario ta resulta cu supuestamente no tin placa, pero di otro banda tin empleadonan nobo cu a wordo tuma entre otro di e canal cu tabata nan competido, esta ATV.

Ademas tin trahadonan cu tin beneficio y otronan cu no tin nada. Otro factor tin di haber cu e maneho nobo cu e directiva a bin cu ne. Un di nan tin di haber cu e empleadonan vast no mag di tin compania di nan mes banda di nan trabou pa evita conflicto di interes. Di otro banda tin empleadonan den staf cu si tin un compania na banda pa gana extra placa. Esaki ta algun di e puntonan cu tin mayoria di e trahadonan vast disgusta, y cu a pone nan bati e porta di FTA atrobe pa busca representacion sindical manera ya a yega di sosode den pasado.

Partidonan
Na salida di e reunion cu mediador di gobierno, director di Tele Aruba Andre Schouten a prefera di abstene di duna declaracion, ya cu ainda nan tin pendiente otro reunion pa diabierna awor y e ta prefera di warda riba e resultado final di e reunion aki.

Di su banda presidente di FTA, Hubert Dirkzs a bisa cu unabes cu Tele Aruba a cay bou e maneho di Setar, nan no tabatin representacion sindical, pero aworaki nan a dicidi di bay FTA pasobra nan ta pasando den cierto situacion cu nan kier un proteccion di un sindicato. Den dos ocasion FTA a reuni cu e trahadonan y mirando cu un mayoria di nan a yena e formulario di afiliacion, nan a pidi reconocimento di gerencia di Tele Aruba pa evita e proceso di un referendum.

E sindicalista a indica cu tin alrededor di 21 trahado, pero 18 di nan tin derecho di vota pa representacion sindical. Di e total di 18 trahadonan aki tin 14 cu a firma e formulario di FTA. No tur trahado tin derecho di vota, ya cu den e canal di television aki tin hendenan trahando cu contract di Setar y otronan cu a wordo tuma for di ATV cu tin otro contract tambe y cu no tin derecho di vota. Tambe tin hendenan cu ta cay bou di staf cu tampoco no por forma parti di e sindicato.

Sinembargo awor cu nan a pidi reconocimento di e sindicato, FTA ta sinti cu tin resistencia, y nan no ta mira motibo di parti di gerencia di Tele Aruba pa bin cu esaki. E ta lamenta cu e posicion aki ta refleha un biaha mas, cu dunado di trabou ta tuma un posicion anti sindical. E ta kere cu unabes cu e trahadonan ta expresa nan deseo pa bira miembro di e sindicato, pio den e circunstancia cu e trahadonan di Tele Aruba ta pasando aden, no tin motibo pa bay un referendum cu ta tuma un tempo mas largo.

Segun sindicalista sr. Dirksz, gerencia di Tele Aruba ta contempla e posibilidad di un referendum, pero FTA ta haya cu e ta un proceso mas largo pa un grupo di trahado relativamente chikito. “Nos no ta mira cu mester tin un tardansa den esaki”, el a bisa.

Sr. Dirksz a indica cu gerencia di Tele Aruba kier sa cual ta e problema di e trahadonan pa eventualmente atende nan. Pero e posicion di FTA ta cu nan ta prefera pa e sindicato ta wordo reconoci prome y despues nan ta atende cu e problemanan. Mirando cu e problemanan ta causando un tension laboral e ta haya cu lo ta faborabel pa FTA por haya reconocimento pa asina conhuntamente contribui na soluciona e problemanan cu ta bon pa Tele Aruba mes. E ta spera cu diabierna awor cu ambos partido ta bolbe reuni cu mediador di gobierno, nan lo por yega bin cla cu e reconocimento aki.

Tin trahadonan cu no ta traha directamente cu e compania, pero nan ta gosa di miho salario y condicion di trabou cu esun cu t’ey vast. E sindicalista ta considera esaki como un sorto di discriminacion, locual ta haci cu e trahadonan vast no ta sinti su mes balora ni respeta. E ta haya cu nan por a biba 15 aña cu e situacion aki, pero aworaki mirando e desaroyo interno, nan a dicidi di acerca FTA. Aunke e trahadonan a yega di acerca STA tambe pero finalmente nan a dicidi di bay cu FTA considerando nan relacion den pasado.

Mediador di gobierno
Mediador di gobierno Anselmo Pontilius a haya cu e prome reunion semper tin discusion den cual e diferencia di opinion t’ey. Pero pa e rason ey e ta haya cu ambos partido, tanto gerencia di Tele Aruba como FTA, a acerca su persona como mediador di gobierno pa busca un bon salida pa ambos partido.

El a trece dilanti cu den e reunion aki, FTA a considera importante pa haya reconocimento pronto pa atende urgentemente cu e problemanan cu e trahadonan tin y despues a largo plaso negosha un contracto colectivo (CAO). Mientras cu gerencia di e compania di television kier sa cual ta e puntonan di discusion. Pues nan ta kere cu no necesariamente nan mester reconoce FTA pa cuminsa trata e diferente kehonan cu tin.

Finalmente e partidonan no por a haya otro ariba e parti principal di reconocimento, pero nan a palabra di sigui reuni diabierna awor den presencia di mediador di gobierno. Segun sr. Pontilius tin diferente opcion pa nan sali for di e impasse aki. Considerando e urgencia cu e trahadonan a pone, el a recomenda gerencia di Tele Aruba cu ta na su luga pa atende e asunto mas diligente posibel. E ta spera cu diabierna awor e partidonan lo por firma un tipo di acuerdo riba con nan lo bay atende cu e parti di reconocimento sindical.