Sindicato FTA a presenta su cambio di imagen y servicio nobo pa trahadonan

Den un conferencia di prensa cu sindicato Federacion di Thahadornan di Aruba (FTA) a haci ayera, nan a anuncia cu nan ta bay cuminsa cu e servicio dirigi na trahadonan Individual y Independiente I&I.

Presidente di e sindicato aki, Hose Figaroa a informa cu otro aña e sindicato ta bay cumpli 60 aña y nan ta bay haci algun cos pa esey, debi cu nan ta un di e sindicatonan mas bieu y mas grandi representando trahadonan di mas di 90 empresa cu mas di 3.000 afiliado.

Na e momentonan aki nan ta consisti di 4 sector cual ta turismo, comunicacion, industria, sector publico y semi-gubernamental. Awor for di 1 di mei pa conmemora Dia Internacional di Trahado nan ta bay den un otro sector denomina “I&I”, cu ta sector individual y independiente.

Di esaki, el a splica cu ta un deseo no di awo, sino di añanan 80 y 90 unda nan a bin cu e pensamento di tin e posibilidad pa trahadonan por bira miembro di FTA no solamente como grupo sino di manera individual.

“Hopi biaha no ta facil den un empresa pa bo por logra cera un grupo suficientemente grandi pa bo por logra un referedum pa negocia un CAO por medio di sindicato. Pero di otro banda, Constitucion di Aruba ta bisa cu cada trahado tin un derecho di afilia su mes na un sindicato,” Figaroa a comenta.

E ora e posibilidad a habri pa trahadonan individual por uni na FTA tambe, aunke Figaroa a sigura cu tabatin obstaculonan di organisacion debi cu bira miembro ta un cos, pero pa duna miembro e servicio ta otro cos. E ta algo importante y e organisacion mester ta prepara pa esey.

Pa haci esaki, nan a haci varios cambio den nan organisacion mes y nan a amplia e cantidad di trahadonan cu mester traha den e parti aki. manera Figaroa a bisa. E servicio ta dirigi na un cierto grupo cu for di algun aña caba ta bin haciendo pregunta tocante esaki.

Igualmente el a informa cu nan a contrata un compania externo pa haci un investigacion no solamente pa nan haya sa e deseonan pa miembresia individual y kico ta e servicionan cu nan por duna den esey.

A base di resultadonan di e investigacion cu a tuma luga na maart di aña pasa, miembresia individual ta algo nobo pa Aruba y pa nan tambe como sindicato cu ta mira un evolucion. “Un trahado di 2023 no ta e mesun trahado di 30 of 40 aña pasa, igualmente cu e mercado laboral y e trabao tampoco ta igual. Bo tin un mercado cambiante y como sindicato bo tin cu adapta bo mes na e cambionan ey,” Figaroa a sigura.

Den esaki nan a haci cambio di imagen dunando nan un look mas moderno y fresco y nan a prepara e organisacion mes pa un reto nobo.

Miembresia I&I ta bay haya e mesun servicio cu tur otro trahado, cu excepcion di un negociacion di CAO, debi cu ley ta exigi cu e trahadonan mester representa e mayoria den un empresa loke ta duna na e trahado un miembresia directo entre su persona cu FTA.

“E miembresia aki ta totalmente confidencial, pagonan no ta sucede via bo dunado di trabou e cual no mester ni sa cu a bo ta miembro di sindicato y pa nos esaki ta un reto nobo, nos ta cla pa cuminsa” el a finalisa.