Ayera atardi trahadonan di Setar na Sero Blanco a dicidi di haci un accion di manifestacion di dos ora cu a ser convoca pa Sindicato di Trahadonan di Telecomunicacion (STT) despues cu nan a tene un reunion na unda nan a laga sa cu no tin mas espacio pa warda riba minister di Comunicacion Geoffrey Wever.

Di otro banda, ayera mainta minister Wever a haci su prome aparicion den un conferencia di prensa pa asina duna e banda di medaya di gobierno pa loke ta trata e recorte di salario pa trahadonan publico y semi-publico na unda cu e declaracionnan di minister no a cay di un bon manera pa e trahadonan di e compania aki.

Presidentenan di otro sindicato a presenta na e luga pa asina duna su apoyo na sindicato STT y tambe na trahadonan di Setar.

Di su parti, presidente di e sindicato aki Jeromin Kelly a trece dilanti cu loke minister a bisa no a cay den bon tera cerca e miembronan, pa motibo cu e ta puntra dicon ora nan ta bin pidi ta bay haci un investigacion y otro companianan a pidi pa no haci investigacion, segun loke Kelly a señala.

“¿Unda e igualdad ta keda den e companianan estatal aki?, tambe nos a haya cu den sector publico, e cos ki ta un inhusticia pa nos y nos no ta bay acepta esaki tampoco”, el a sigura.

Ayera nan a dal nan prome paso manera Kelly a bisa y tanten cu nan no lo wordo scucha nan no ta descarta cu e accion lo por sigui otro dianan tambe, “ si nos no tende nada, e lo sigui sigur”.

Igualmente el a bisa cu e sindicato aki tin 321 miembro na unda cu teleshop tambe a wordo cera y na e momento ey e unico departamento cu a keda na pia di trabou tabata esun cu tabata na warda y e call-center, tambe el a sigura cu nan a informa gerencia tocante e actividad aki.

Director di Setar, Roland Croes a duna un declaracion na prensa presente na unda el a bisa cu e no por duna mucho comentario, el a compronde cu trahadonan kier un discusion cu gobierno, “exactamente mi no sa ainda, mi tin cu papia cu sindicato su presidente, pero como Setar e asunto di 12.6% ey ta algo cu gobierno a instrui na tur N.V, a mi como director un di e cos cu mi por haci ta, mi ta voer uit loke e instruccion cu Hulanda a duna Aruba, anto e ora si tin cualkier cambio of otro cosnan cu nos por haci, e ora mi tin cu haya un instruccion pa wak kico ta un otro manera pa haci’e” Croes a finalisa.

Ayera atardi tambe a keda conoci den diferente medionan di comunicacion social cu Secretario di Estado Raymond Knops a declara den Eerste Kamer na Hulanda cu Gobierno di Aruba ta esun cu a ofrece pa corta den salario di trahadonan e porcentahe di 12.6% y no Hulanda manera gobierno a declara.