Sindicato di Trahadornan den Telecomunicacion STT: “Nos ta dispuesto pa ta solidario cu pueblo, pero mester ta pa un y tur”

Den dianan aki e topico di recorte di salario di 12.6% pa empleadonan publico y semi-publico a bin dilanti varios biaha na unda cu prome minister Evelyn Wever-Croes a confirma cu esey lo sigui tuma luga aunke e programa di ayudo FASE no lo continua mas.

Pa cu esaki, sindicato cu ta representa trahadonan di telecomunicacion specificamente di Setar (STT) y su presidente Jeromin Kelly a splica tocante un reunion cu nan a tene ayera cu minister di Comunicacion Geoffrey Wever.

Kelly a expresa cu siman pasa nan a manda un carta na minister Wever y ayera nan a trece dilanti cierto puntonan di preocupacion cu nan tin, mirando cu for di 13 di maart di aña 2020 Aruba a drenta den un crisis economico pa via di pandemia di Covid-19 esey tambe tabata inclui cu tur ciudadano mester coopera pa e isla bay dilanti.

Den e carta nan a indica cu nan no ta di acuerdo con entregamento di salario di 12.6% ta bayendo, “nos tur por compronde ora nos a lesa e Uitvoering Rapportage di gobierno mes cu a manda pa nos ta duidelijk para, cu no ta tur compania a entrega”, el a bisa.

Den kwartaal uno 7 compania di 23 a entrega, den kwartaal dos 11 compania y den kwartaal tres 12 compania so a entrega e fondonan pa asina coopera cu e programa di ayudo FASE dirigi pa esunnan cu a keda sin trabou pa via di pandemia Covid-19.

“Nos no sa si tur hende a entrega mescos, pero un cos nos por bisa cu Setar a entrega manera cu e ta, al pie de la letra”, Kelly a sigura.

Di mesun manera, el a menciona cu sindicato STT ademas di ta contribui solidariamente, nan tambe a contribui por medio di dividendo, nan tambe ta duna winstbelasting y nan ta paga nan licencia di tur aña, “nos por bisa cu Setar ta contribui grandemente na e caha di gobierno”, el a bisa.

Despues di declaracionnan di prome minister di dialuna ultimo durante un conferencia di gobierno na unda a indica cu si companianan no lo cumpli cu e solicitud di entregamento di salario di 12.6% esey ta bay keda hancra den un ley si lo ta necesario pa asina tur compania estatal cumpli cune manera Sint Maarten y Corsou a haci.

Locual lo cambia un bes cu no tin FASE mas, ta cu no mester deposita e recorte den e fondo mas, pero e placa por keda den e compania y yuda den cash flow di e compania.

“Esey pa nos tabata un falta di respet totalmente pasobra for day one nos tabata solidario cu pueblo, nos ta dispuesto pa ta solidario cu pueblo pero e mester ta pa un y tur,”, Kelly a enfatisa.

Asina mes, el a bisa cu nan no ta aplaudi e declaracion di prome minister pa motibo cu tin companianan cu no a entrega, tin otro cu a entrega un cierto cantidad y no loke ta wordo indica, nan ta ansioso pa sa si Corsou y San Maarten si a entrega e 12.6% mientras nan a haya e tranche tur e tempo, esey ta un contesta cu nan kier haya di gobierno tambe, segun Kelly a bisa.

Ora cu directiva y miembronan di sindicato a haya cu no tur compania ta cumpliendo cu esaki, segun Kelly a indica nan a haya reclamo di parti di e miembronan pa lo cual nan a dicidi di manda un carta na minister Wever pa asina e por duna un contesta na nan.

Gobierno a bisa na sindicato pa duna nan un siman pa haci un investigacion na unda Kelly a declara cu “¿pakico awor ora cu nos a pidi algo cu otro compania a haya, di repenti mester duna nan un siman di tempo pa haci un onderzoek?, ora cu otro companianan a pidi no a duna nan un siman pa haci un onderzoek, nan a bay mesa hunto cu director y nan a negocia y yega na un acuerdo, ¿pakico awor nos no por haya e mismo trato cu otro companianan a haya?”, Kelly a expresa.

For di aña pasa caba sindicato STT y sindicato SIWA a bay na mesa hunto cu prome minister y minister di Finanza Xiomara Maduro pa hala atras e decision, asina mes, Kelly a bisa cu den e investigacion cu nan lo haci si nan lo haya un discrepancia nan lo haya e diferencia back.

Sindicato STT a puntra pa minister Wever ken ta esun cu lo paga back si ta gobierno of otro instancia, “loke a bay, ¿con nos ta haci pa hay’e back?” na unda cu den esaki Kelly a comenta cu tabatin cierto discusion riba dje pa wak kico ta e maneranan pa haci’e.

Ademas, el a informa cu awe den oranan di atardi nan lo tin un reunion cu nan miembronan pa asina nan tuma un posicion riba e carta cu nan a haya di minister Wever.

Nan ta pidi gobierno pa haci e proceso aki di manera transparente, for di algun tempo pasa nan a pidi pa tur luna pa nan por manda un overzicht di companianan cu si a entrega manera mester ta y e contesta cu nan a haya ta cu esey ta publica riba nan website.

“No ta cuestion si ta riba e website, ta cuestion cu nos ta entrega y nos kier wak na unda e ta bay”, el a comenta.

Despues di el anuncio cu ayudo di FASE lo stop Kelly a expresa cu esey tambe ta un otro problema pa motibo cu a bisa nan cu e placa ey e compania ta retene, “¿pero ta retene pakico? Esey tabata pa companianan cu tabatin problemanan financiero of cu cash flow pero aworaki companianan ta bayendo bon y e ta puntra pakico e retencion di placa y kico ta bay haci cu e placa ey cu no ta bay pa FASE, “e parti ey tampoco nos ta compronde y pa esey nos tambe ta bezig cu abogado”, Kelly a menciona.

Pa finalisa, nan no ta descarta un accion pa e dia di awe.