Ayera tardi, sindicato di Polis di Aruba (SPA) a tene un reunion cu un grupo masha limita di miembronan na Club POVA. Presidente di SPA, Edgar Maduro a lamenta cu hopi di nan miembronan no a bin na e reunion pasobra ‘nan a wordo stroba door di nan hefe’.
El a considera e reunion aki importante, ya cu nan a trata diferente aspecto cu SPA ta considera cu gobierno anterior no a pone atencion riba nan. Entre otro e necesidad di ekiponan y material optimal pa nan realisa nan trabou di siguridad debidamente. Nan ta contento cu e patruya nobo pa vigila nos costanan pero tin otro seccion di polis mester auto entre nan recherche.
Minister di Husticia, Andin Bikker (POR) a bay reuni cu e directiva di SPA, caminda el a expresa cu ta consciente di e dificultad cu polis ta pasando aden. El a pidi nan te otro siman pa duna un contesta na nan preocupacionnan.
Presidente di SPA a bisa cu nan no a duna e mandatario un deadline of termino, sino cu e mes a bisa cu den transcurso di otro siman tin un contesta y lo bay bin un accion.
SPA ta haya cu e actitud aki ta mustra cu e mandatario ta pro polis y cu tambe e kier yuda resolve e problemanan chikito cu ta birando un problema grandi.
