Sindicato di Polis Aruba (SPA) a tene un reunion general caminda nan a papia di diferente punto cu a trece dilanti y cu lo kier mira cambio. Presidente di sindicato, Joselito Dirks a splica tocante con e reunion a bay.
Dirks ta bisa cu a mira varios miembro cu a mustra interes, cual esey ta haci cu sindicato ta mas stabiel pa por tuma accion. E prome punto tabata e parti di pensioen. E ta bisa cu ta bringando pa baha edad di pensioen di Polis ‘mirando e peso di e trabou’.
E ta bisa cu den comparacion mundial, esaki ta algo posibel. Nan tin reunion cu Minister di Labor dia 2 di october proximo, pa asina papia tocante e punto di pension.
Tambe a combersa tocante e edificio na Wayaca. Dirks ta bisa cu e situacion y construccion ta tumando luga, pero Warda di Polis ni Recherche por bay Wayaca ainda. “Tin cierto trabou cu mester wordo haci na Doc Opleding pa Recherche mientras cu e trabou keda cla.”
Tambe el a comparti di algun preocupacion chikito, cu ta prefera di no divulga cada paso prome, pa despues esaki keda publica den prensa. Dirks a bisa cu lo manda un carta pa gobierno, pa locual ta indexering, anto tin algun otro topico cu lo atende e momento ey.
A puntra Dirks con ta cu e personal di Polis, si ta uno cu mester mas, of si no ta e caso. E ta bisa tin cantidad di Polis; sinembargo e poblacion tambe a subi. No tin cu ta yega pa haci opleiding, tambe tin di e Polisnan cu ta bayendo for di dienst of pensioen ‘locual ta crea un gap’.
E ta bisa si cu ta busca diferente manera pa yena e buraco cu hende local, pero e ta remarca cu no ta un proceso facil pa drenta opleiding di Polis. Esaki pa motibo cu mester pasa tur test ya cu e idea ta pa mantene e nivel, y esaki no ta algo facil.
