Diabierna ultimo, diferente sindicato a uni pa duna apoyo na polis y Sindicato di Polis di Aruba (SPA), den un accion mediante cual nan ta exigi for di gobierno un contesta concreto tocante e manera con indexering di aña 2018 lo wordo paga. E tema aki ta bin dilanti for di luna di april, ora nan a cuminsa reuni pa haya contesta tocante esaki.
Jose Dirkz, presidente di SPA a splica cu nan a haya sorpresa di e apoyo cu nan a ricibi di sindicatonan manera SIMAR, SADDA y SEPPA. Tambe a menciona cu nan ta satisfecho cu e manera con e accion aki a bay. Esaki a sosode pa via di un mandato di nan miembronan, durante un reunion general di siman pasa den cual un di e puntonan riba agenda tabata indexering.
Di mesun manera, Dirkzs a menciona cu for di e reunion no a bin ni un propuesta concreto di parti di Gobierno di con indexering di aña 2018 lo wordo paga. Tambe el a bisa cu su coleganan no a acepta esey durante reunion, pero nan a haya un mandato y nan a manda un carta pa gobierno pa exigi e pago.
Den e carta, Dirkzs a señala cu nan a pone un ultimatum pa loke ta trata contesta. E ultimatum a pasa y na no a haya ningun contesta di Gobierno, y pa e motibo aki nan a yama pa otro reunion general, pa asina informa e coleganan tocante kico ta e situacion di indexering na e momentonan aki, pero coleganan no a acepta esey.
Mirando esaki, Dirkzs a manifesta cu nan a bin cu mocion pa cuminsa e accion cu a tuma luga diabierna pasa di 1or pa 3or di atardi, cu e cual nan mester tin un personal minimo den cada departamento. Ademas el a contesta cu esaki tabata e prome paso di e accion y nan ta espera cu proximamente nan lo por haya contesta di gobierno. De lo contrario, no ta descarta cu accion lo continua.
Tocante e reunion cu sindicato tabatin cu Minister di Husticia, Andin Bikker diahuebs pasa, el a informa cu minister kier intermedia, pero e sindicato a haya un mandato di su coleganan. Di loke ta trata e proximo paso, Dirkzs a expresa cu nan lo duna gobierno algun siman mas pa bin cu un contesta concreto pa mira con ta bay paga indexering di aña 2018.
