Fin di siman aki tabata uno polemico pa via di comentarionan riba rednan social pa loke ta trata sindicatonan. Un di nan a bin for di Gina Maduro, presidente di sindicato ABV di Hospital Horacio Oduber, ken a laga sa cu trahadonan di hospital a mantene nan 100% di vakantie uitkering. Esaki a causa conmocion entre otro sindicatonan.

Diasabra den oranan di anochi, medionan local a wordo convoca pa un conferencia di prensa na warda di Polis Shaba na Noord, na unda presidente di sindicato di polis STA, Jose Dirksz a trece dilanti nan punto di bista tocante e situacion aki. Ademas polis a tuma e decision di pone nan trabou plat pa dos ora, desde 10or di anochi te 12or di marduga.

Dirksz a menciona cu diasabra sindicato di polis a haya diferente reaccion di hopi malcontento y disgusto di parti di trahadonan di polis. Mirando cu for di comienso di tur e problema di pandemia y toque de queda, ‘nos a sacrifica tur marduga, tur polis riba caya, mi persona mes como sub-fiscal mester a sigura pa e cos cana nechi; pa asina cu Gina Maduro di Hospital ta blof cu a nan no ta kita e vakantie uitkering ni kita nada di nada. Esey a cay mal den tera mes pa polisnan mirando cu a nos si ta pone nos bida den peliger afo’, asina Dirksz a expresa.

Di mesun manera, el a comenta cu nan no ta acepta e tipo di comentarionan aki y nan a condena esey completo. “Awor mas cu nunca nos no ta acepta cu gobierno ta yega y tuma medida cerca nos sin consulta cu nos. Anto e grupito cu ta sostenedo di gobierno, anan si no ta haya ningun medida”, Dirksz a manifesta.

Pa e motibo aki, miembronan di sindicato a exigi pa cuminsa mesora tuma accion y diasabra ultimo den oranan di anochi a haci un walk out di dos ora. Durante siman lo bay tende mas di e miembronan ki tipo di lo continua haci.

Dirksz a señala cu nan tambe ta frontliners. Mundialmente polis tambe ta frontliners, na henter mundo na momento cu tin un crisis, no ta ni mishi cu salario di polis. Al contrario, nan haya tur beneficio door di ta frontliners. “Aruba ta e unico pais na mundo caminda cu polisnan ta frontliners y ta corta den nan salario y ta exigi mas di bo tambe” Dirksz a declara.

Ademas, el a bisa cu nan a papia cu minister di Husticia, Andin Bikker y minister di Salud, Turismo y Deporte, Dangui Oduber, pero te eynan e palabracion a keda. “Loke Gina Maduro a haci ta den un herida a tira salo. Pasobra nos tin dolor cu nan ta corta nos salario y riba dje ta blof un cos asina, esey ta inaceptabel” Dirksz a afirma.

Asina mes, el a bisa cu gobierno mester contesta pueblo con nan ta discrimina e frontliners. Ademas a menciona cu nan ta delibera cu otro sindicato, pero na e momentonan aki Dirksz a comenta cu e ta representando polis y e tin cu bay segun e mandato di polisnan.

Bon Dia Aruba tambe a busca e reaccion di otro sindicatonan tocante e situacion aki. Un di nan ta SIMAR, sindicato di maestronan. Di su parti presidente Josephine Albertus a declara cu kier elogia gerente di Hospital Horacio Oduber, cu mesun cu gobierno di paisnan Corsou y St. Maarten a sinta na mesa y a busca otro alternativanan pa baha gasto.

Albertus tambe a trece dilanti: “E accion aki ta algo di admira con HOH, como dunado di trabou, no a scoge e caminda facil di rebaha e salario bruto di nan trahado pa baha gasto. Pero a sinta na mesa, tuma nan tempo, evalua diferente escenarionan y por ultimo tuma un decision cu ta wordo carga pa tur actornan.”

“E ta deseo di tur sindicato y trahado pa sinta na mesa cu dunado di trabou, cu no solamente tin bienestar di compania na pecho, pero tambe di su trahado y sin tin nodo di protesta. Maestro bo no ta kere a bira tempo pa nos tambe exigi un trato asina?”, Albertus a sigura.

Magaly Brito di sindicato SEPPA tambe a duna un contesta riba e situacion aki y a manifesta cu negociacion riba condicion di trabao mester sucede na mesa, na unda partidonan ta dialoga y mira na unda partidonan por yega na acuerdo. “Di nos banda nos ta contento cu e trahadonan di Hospital a haya e derecho di negocia y no manera cu a sucede cu empleadonan publico, esta cu a impone riba nan salario. Pero loke ta remarcabel akinan tambe ta e hecho e unidad di trahadonan di hospital pa defende nan condicionnan laboral. Unda por scapa un trahado for di un dolor of bay atras, Seppa sigur ta di acuerdo of ta sostene e lucha pa esaki,” Brito a specifica.

Tambe, el a agrega: “Ta cuestionabel ta con e sindicalista di ABV a grita Pro, Pro y mas cu Pro pa medidanan riba e ambtenaar. Pues eynan si e tabata contra e derecho di dialogo y di negociacion pa e ambtenaar e.o. door di yama sindicatonan y empleadonan publico pa sinberguensa; ya cu mester corda cu eyfo ta hopi trahado a perde trabao y a keda sin entrada.”

Importante ta pa destaca cu minister Dangui Oduber a publica riba rednan social cu e accion di sindicato di Polis STA ta lamentabel, pa via cu nan a basa e accion riba un expresion di otro lider sindical, cu un si lo mester entrega pero e otro no. Pa e motibo ey e sindicato di polis, sin tin informacion corecto, a dicidi di pone trabou abou y pone orden publico na riesgo.

El a specifica tambe cu Gobierno di Aruba ta declara enfaticamente cu empleadonan di Hospital tambe ta entrega. Sinembargo, sindicato di polis no por compara polis cu ta ambtenaar, cu empleadonan di hospital cu no ta ambtenaar y no tin tur e beneficionan primario ni secundario cu polisnan y demas empleadonan publico tin.

Oduber a expresa cu tin hopi diferencia entre e dos gruponan aki: salario, overtime, vakantie, ATV, indexering, back to school premie, bashi premie. Esaki ta e motibo cu Hulanda desde un tempo caba ta poniendo presion riba Gobierno di Aruba pa baha e gastonan di salario di e empleado publico.

Empleadonan di Hospital tambe ta entrega mescos cu ta wordo spera di tur trahado na instancianan publico y semi-publico na Aruba. “Mi ta haci un apelacion riba un y tur pa nos laga sano huicio prevalece. E crisis aki a causa hopi dolor na hopi famia cu a perde tur cos. Ta pidi un aporte di 5% na unda otro trahadonan a perde hopi mas”, Oduber a finalisa.