Un biaha mas, Sindicato di Maestro SIMAR hunto cu sindicato SEPPA y docentenan a duna di conoce nan mal contento pa loke ta trata situacion di scol Paso pa Futuro. Esaki pasobra cu segun minister di Enseñansa, Armando Rudy Lampe a dicidi di muda e scol aki na otro localidad pa motibonan financiero.

Manera keda conoci na luna di juni, docentenan y ekipo di scol Paso pa Futuro a haya e noticia cu nan tin cu muda na luna di december pa otro localidad. Segun e sindicatonan, e situacion aki a wordo resolvi mediante un carta cu e mesun minister a manda pa nan, pa informa cu e accion ey no lo tuma luga mas.

Josephine Albertus, presidente di SIMAR, a specifica cu siman pasa nan a wordo acerca door di e docentenan y ekipo di scol Paso pa Futuro, pa papia tocante un situacion cu nan tabata pensa cu a wordo soluciona. “Diripiente minister di Enseñansa kier bin cambia loke el a bisa y te hasta el a pone por escrito”, el a señala.

Esaki ta un situacion “fastioso” segun el a sigura, pa motibo cu sindicato a cana cu nan na luna di juni, caminda cu nan a vocifera y a splica e motibonan pakico e scol aki tin cu keda na unda e ta na e momentonan aki y no bay na otro edificio. Aawor e minister ta bin back atrobe di un manera cu nan no ta compronde, na unda el a informa cu nan tin cu sali di e edificio.

“Esaki ta un falta di respet, pasobra scol a splica cu ora di keda den e edificio na unda nan ta, nan por garantisa enseñansa di calidad, mirando kico tur tin den e localidad aki”, Albertus a sigura.

Segun tambe el a destaca, Lampe a pidi pa nan sali for di e luga y di e manera ey, segun Albertus, nan lo por baha e calidad di enseñansa. “Esaki no por.” Na luna di juni manera el a comenta, e nivel di stress di docentenan tabata halto. Y pa via di crisis di Covid-19 nan a haya un extra peso riba nan, aunke un acuerdo a keda palabra y riba papel.

Asina mes, el a anuncia cu nan a manda un carta pa minister Lampe pa haya un clarificacion di su banda riba e situacion aki, mirando loke ta sucediendo, cu mayornan ta acerca docentenan pa puntra un biaha mas si nan yiunan tin cu keda na scol Paso pa Futuro of si nan tin cu bay pa SPO.

Directie conhuntamente cu e ekipo di scol a manda un carta pa minister Lampe ora nan a keda envolvi den e situacion y te ainda nan no a haya oido di minister. Pa loke nan a dicidi di sigui cana nan caminda. Nan a acerca sindicato SIMAR pa motibo cu nan a haci’e manera cu mester ta pa haya splicacion, pero nan no a haya esey.

Segun Lampe, na prome instante el a wordo bisa cu tin cu tuma e accion aki pa motibonan financiero y otro motibonan. Pero Albertus ta señala cu si laga e scol na unda e ta e lo ta miho pa finanzas, mirando cu si nan tin cu bay edificio nobo, tin cu haci algun cambio pa motibo cu e edificio no ta adecua.

Loke nan ta pidi pa Lampe ta un aclaracion of splicacion di e motibonan pakico cada biaha minister ta palabra algo y despues e ta cambia di decision. “Asina nos no por traha” y esaki ta algo cu cada maestro den enseñansa mester sa, cu mester traha di un manera structura.

Manera ta conoci, scol Paso pa Futuro ta dirigi pa muchanan special y desde cu e situacion aki a cuminsa, docentenan a expresa na e cabesante anterior pakico nan ta hibando e lucha pa salvaguardia e edificio di scol. Di igual manera nan ta sigura cu e scol ta wordo adapta pa studiantenan por haya nan enseñansa na nan nivel, pero tambe di un forma practico.

Tambe a informa cu cabesante di scol na e momentonan aki, Miriam van den Biezen durante un reunion dia 28 di augustus a trece un punto masha preocupante mes pa e docentenan y ekipo di scol, cu nan sala di reunion egun DPL ta wordo considera un luho y ta pidi pa nan sacrifica esey, pa asina e scol presta esaki pa bira un kleuterklas, algo cu a cuminsa tuma luga dialuna 31 di augustus.

Di esaki, nan a menciona cu e luga no ta adecua ya cu e edificio no ta sigur y cu a wordo revisa pa departamento di Brandweer.