Sindicato di Maestro (Simar): “Nos ta spera cu minister lo honra loke a wordo palabra den reunion”

Sindicato di Maestro di Aruba a ofrece un sesion online informativo pa duna detaye di cierto puntonan den enseñansa na e momentonan aki, ademas e situacion cu a tuma luga na Colegio San Nicolas siman pasa.

Josephine Albertus presidente di sindicato a splica cu ora scolnan ta cuminsa, maestronan ta haya nan rooster y riba dje e ta wak cuanto les tin y cu ta bay duna pa e aña escolar ey, tambe ta haya un lista di e cantidad di alumnonan cu tin den klas y cuanto klasnan tin.

El a menciona cu esaki no ta responsabilidad di e maestro, e responsabilidad pa traha rooster y lista di muchanan, e grandura di klasnan, etc , otro departamentonan tin e responsabilidad pa haci esaki.

Nan ta cuminsa cu directiva di scol y na Colegio San Nicolas ta papia di DPS, departamento di Inspectie y departamento di enseñansa, nan ta esunnan cu tin cu aproba pa motibo cu na fin di luna nan tin cu manda tur e oranan pa financien pa asina e educador lo wordo paga.

Albertus a señala cu nan como Simar no ta contra di saca un rapport pero, prome cu esey mester haci e contenido di e rapport conoci pa e maestronan, pa via cu mester bin cu cambionan y ta e maestronan esun cu mester ehecut’e.

Di loke nan a tuma nota dialuna ora minister di Enseñansa Armando Rudy Lampe na unda a duna di conoce un rapport di Colegio San Nicolas, maestronan mes no tabata na haltura di esaki, “y esey ta algo cu Simar no por para su tras”. Pa motibo cu si e rapport ta pa trece informacion esey no ta problema, pero e mester bira conoci pa maestronan.

Den e rapport, manera Albertus a indica a wordo papia di aspectonan cu mester di coreccion, como por ehemplo a wordo papia di yenamento di cifra, grandura di klasnan, entre otro.

Ademas a wordo treci dilanti un plan di siguridad cu maestronan no tin responsabilidad riba dje sino e directiva di scol cu ta traha un plan di siguridad, e ta mand’e pa su scolnan y cada scol ta bay wak conhuntamente den su scol e infrastructura con nan por ahusta esaki pa asina e por realistico pa nan.

Pa loke ta trata yenamento di cifra, Albertus a declara cu den rapport algun docentenan no a yena nan cifra pero nan ta lamenta cu no a tene cuenta di tur e factor cu por ta un motibo valido di pakico e cifranan tabata ausente na e momento cu ta drenta den sistema cu ta hinca e cifranan.

“Den rapport a wordo papia di A.O pero tin mas factor”, Albertus a comenta.

Pa e motibo aki, nan ta haya importante pa aclaria cierto aspectonan pa motibo cu docentenan ta trahando cu alma y cuerpo pa por brinda e muchanan e enseñansa bou di diferente circunstancianan y cu awor cu e rapport segun Albertus a bisa nan por deduci cu hopi cosnan tabata falta den rapport cu no a tene cuenta cune, e parti mas principal cu nan ta haya ta cu ningun momento e rapport no a bira conoci pa maestronan manera a menciona caba.

Diahuebs ultimo maestronan di San Nicolas a haya un reunion cu minister Lampe y Simar na unda minister mester a wordo duna claridad riba e rapport aki y cu docentenan no ta culpabel di loke tin den rapport.