Durante un sesion informativo cu Sindicato di Maestro di Aruba (SIMAR) a ofrece, nan e trece dilanti e situacion laboral riba enseñansa durante crisis di Covid-19, mustrando cu prome cu esey tabata existi hopi reto den area di enseñansa caba.
Den sesion aki, Josephine Albertus hunto cu beleidsmedewerker Flora Petronilia Arbodeskundige nan a expresa cu pa via di pandemia Covid-19 tin cierto maestro- y mayornan cu tin preocupacion, principalmente riba e parti di protocolnan. Na momento cu e di dos ‘wave’ di casonan na Aruba a yega na cero caso positivo, scolnan a cuminsa prepara pa habri back. Pero na e momentonan aki cu casonan ta aumentando asina lihe, hopi hende ta haya miedo.
Petronilia a menciona cu e situacion aki ta uno cu niun hende a spera cu lo por a yega asina leu. Su persona como Arbodeskundige a splica cu ora Covid-19 a cuminsa haci su entrada, a crea diferente comision specialmente di su banda pa haci un inspeccion, pa wak kico tabata e negoshinan esencial y cua no tabata esencial.
For di prome momento, el a bisa cu ya caba nan tabata bezig cu e diferente comision na unda prome minister ta esun cu ta encarga di tur. Entre nan tabatin cierto kinderopvang y scol pa cuminsa tuma decisionnan pa loke tabata trata habrimento di scol.
El a comenta cu nan a haya cierto situacionnan cu tabata pisa pa via di Covid-19 y nan a bay den parti preventivo, pa implementa prome cu bay den fase di habrimento y economia cuminsa draai back. Como ehemplo tur e supermercado cu a wordo pinta cu flechanan, pone hand sanitizer, social distancing y tur esey tabata e parti riba cual nan a traha, segun Petronilia a informa.
Despues a bin loke tabata e parti di dunado di trabou y trahado. Pa loke ta trata scolnan Petronilia a expresa cu task force a bay den e parti di Departamento di Salubridad Publico (DVG). Arbodeskundige ta bisa cu segun e normanan, tin cu haci investigacion pa wak y señala na unda posiblemente por tin riesgo y di e manera ey sa con tin cu atende cu e situacion.
Pa scolnan, tin protocolnan cu DVG a crea y di eynan nan ta basa nan conseho, hunto cu WHO y ya cu tin cierto politica, gobierno mester zorg pa maneho. Locual ta keda ta cu na un scol tin su bestuur, maestronan, alumnonan, esun cu traha den scol; awor e bestuur tin cu traha basa riba maneho di scol, na unda tin cu calcula cuanto mucha tin den cada local y con nan ta bay sinta pa aplica distanciamento social, na unda tur mucha no por sinta hunto. For di eynan ta bin un maneho pa dicidi cuanto dia lo duna les online.
Di e parti di ventilacion di e lokaalnan, Petronilia a splica cu den e parti aki nan a haya hopi problema. Desde algun tempo pasa hopi scol a bringa pa duna les cu airco, cu segun su persona e parti ey ta bon, pero mester sa cu tin cu haci e airco limpi cada cierto tempo. Ademas tin scolnan cu tin algun airco hopi bieu, pero igualmente e local mester tin un ventilacion, manera habri porta y bentana pa biento por circula y haci e area fresco. “Esey ta e parti cu Covid-19 ta pidiendo nos”, Petronilia a specifica.
Pa Arbodeskundige el a bisa cu Covid-19 a trece un cambio. “Un cambio pa nos, nos tin cu bay den mundo moderno.” Asina mes, el a afirma cu tur hende mester para keto.
Segun Petronilia e Covid-19 pa parti di maestro ta nifica un impacto. Den e parti social tambe ta hopi duro pa motibo cu como mama y como maestro tin cu enfrenta un klas, tin un cultura cu tambe tin miedo, manera con pa yega na e cabesante pa papia.
Di esaki, el a enfatisa cu mayornan mester bay scol, papia, expresa nan incertidumbre y busca opinion, pa no keda den e situacion ey. Pa motibo cu di e manera aki e persona no por funciona y no ta captura e mensahe cu despues lo wordo refleha den nan cas cu algun problema, “pasobra e persona no ta sinti bon”.
Ademas, el a declara cu maestronan semper mester tin bon contacto cu alumno- y mayornan. Por ehemplo si un mucha ta malo y no por bay scol, si localnan tin ventilacion, cumpli protocolnan di prevencion, entre otro, si tin tur esey ya caba tin un 80% haci, el a finalisa.
