Ayera atardi Sindicato di Maestro (SIMAR) a duna di conoce cu nan a haya algun documentonan firma pa secretario van di ministerrad tocante algun beneficio cu trahadonan di departamento di enseñansa ta haya y cu segun su presidente Josephine Albertus a sigura, esey no ta conta pa tur.
“Minister a bisa cu no tin placa y ta corta tur caminda den enseñansa, pero pa hinca su hendenan si den camindanan pa esey si tin placa”, Albertus a expresa.
Den e documentonan cu sindicato a wordo publica por a mira tur e personanan cu ta traha den bureau di minister di Enseñansa, Ciencia y Desaroyo Sostenibel Armando Rudy Lampe, tambe el a señala cu nan como sindicato no tin problema den e ora di haci cambio “pero no kibra enseñansa”.
Asina mes, el a splica cu pa e personanan aki e retene 25% toelage pa luna, ademas di Afl. 250 di Telefoontoelage pa luna y Afl. 250 Autotoelage pa luna, y a scoge pa reduci impuesto di enseñansa den general, reduci salarionan di maestro, aumenta presion di trabou di maestro y gastonan di nan pa por duna les na distancia, ademas di termina contract di werksternan per 31 di december 2020.
El a considera cu atake contra enseñansa lo stop, pero manera el a reacciona “Simar a tuma nota di lo siguiente, al contrario na Covid-19, cu a conoce 2 ola , enseñansa ta experenciando mas di 2 aña bou di ola di atake”, el a manifesta y ademas finalisa cu comunidad lo no sorpresa si esaki lo scala den accion un biaha mas.
