Ayera mainta, sindicato di Brandweer SINBA a ofrece un conferencia di prensa na unda nan a presenta nan directiva nobo. Tambe nan a duna di conoce algun preocupacion y mal contento cu ta existi den cuerpo di bombero.

Davni Roza, presidente di SINBA, a splica cu pa basta tempo sindicato a bay pa diferente lucha contra gobierno, como welga, protestanan y diferente accion, den cual nan a logra e mayoria di e meta pa nan miembronan.

Ademas el a bisa cu departamento di brandweer ta bayendo atras den tur sentido. Algun miembro a busca firma pa motibo cu nan ta traha segun statuut pa bin cu un eleccion pa asina por cuminsa drecha y traha pa mehoracion di e cuerpo y siguridad di e pais.

Despues cu eleccion a tuma luga, dia 1 di november e directiva nobo a wordo nombra. Nan a haya trucknan ta den mal estado, edificionan tambe ta den mal estado, den tres aña nan no a haya uniforme, bomberonan ta coriendo peliger pa via di e trahe cu nan ta usa na momento di haya un candela cu no ta protege nan manera mester ta, entre otro problemanan, cu segun Roza a sigura “ta un situacion hopi fastioso”.

Tambe, el a menciona cu e opleiding ta canando hopi atras. E miembronan di e cuerpo ta trahando casi 24 ora y nan ta sinti hopi fada y cansa pa via di e situacion aki.

Pa hopi aña nan a haya e situacion pa drecha, pero te cu awor nada no a wordo haci. Al contrario ta birando pio, segun loke Roza a sigura, como tambe a señala cu durante e temporada aki di Covid-19, ‘Brandweer ta e departamento cu mas malo a pasa’.

Nan a trece dilanti cu na e momentonan aki te ainda nan no sa kico lo pasa, pa motibo cu nan no sa ki maneho e departamento lo bay tin. Desde aña pasa nan a cuminsa sinta na mesa cu minister di Husticia, Andin Bikker, y Gobierno di Aruba, Parlamento, Gobernador pa splica tur e mal contento cu ta existi hunto cu mal estado di instalacionnan y ekiponan.

“E trucknan a wordo drecha, pero nan a keda cu e mesun problema, pa motibo cu nan ta for di aña 1996 cu no ta keur mas. Nos ta kere cu den nos auto di second hand nos ta core miho cu den e truck.” Y pa e mesun motibo el a bisa brandweer ta tarda un tiki pa yega ora un emergencia ta presenta.

Durante toque de queda, Roza a informa cu e unico cos cu bomberonan a haya pa laba man ta awa cu clorox. Door cu nan a bay minister despues nan por a haya hand sanitizer y gloves; asina tambe nan a invit’e pa e por yega oficinanan di cuerpo di bombero ‘y por wak e estado deplorabel den cual nos ta trahando’.

El a declara cu e bañonan no ta traha, stoelnan ta kibra, no tin un water cooler, pa loke el a sigura cu nan ta trahando di un manera ‘inhumano’.

Pa tur e motibonan aki, el a afirma cu nan a manda un carta pa gobierno, pero e contesta “ta tardando demasiado”. El a splica cu nan a forma un comision, pero den e dianan aki nan a haya cu tin diferente problema y pa via di esey e departamento no ta funciona, y cu nan problema ta keda cu minister Bikker. “Nos ta yam’e, e ta scucha, pero no ta tumando carta den asunto.”

Alabes, Roza a laga sa cu e cuerpo di bombero tin un debe cu Web for di tres aña habri, algo cu nan tin cu paga anualmente manera henter comunidad.

Desde 2011 trahadonan a cuminsa firma riba e mal maneho di brandweer Aruba y na luna di mei ultimo trahadonan a bolbe firma pa e mesun motibo, el a sigura cu nada a wordo haci te cu awe.

Di loke ta trata indexering, nan a expresa cu nan no a subi caya pa motibo cu directiva a bay sinta cu instancianan pa wak con e situacion di e pais ta, y nan a haya cu e pais ta ‘milliard den cora’. P’esey e sindicato SINBA no a subi caya pa entrega firmanan.

Di mesun forma, miembronan di departamento a haci un peticion pa investigacion tuma luga den cuerpo di bombero, pa motibo cu segun Roza a expresa, a cumpra computer, a bende truck di brandweer y nan kier un claridad riba tur esaki.

Roza tambe a informa cu desde awe pa dilanti nan ta bay cuminsa cu accion di morocoy tanten cu loke a wordo poni riba carta, pidi pa gobierno, wordo haci. El a sigura cu “Gobierno a haya un chens pa actua pasobra nos no ta pidi placa, ta cosnan cu un bombero mester na pia di trabou”.