Ayera mainta Sindicato di Aduana di Aruba (SADA) a ofrece un conferencia di prensa pa trece dilanti varios hecho cu a tuma luga for di diabierna di siman pasa, relaciona cu e tumamento di oranan liber ekivalente na 12.6% di recorte di salario.

Despues di un reunion cu directiva ayera mainta, nan a dicidi di duna informacion na comunidad cu nan a considera importante no solamente pa esnan cu tabata sigui e diferente acontecimento di siman pasa, sino tambe pa nan coleganan cu no a logra sigui e reunion virtual cu nan a tene diasabra ultimo, unda nan a papia tocante e situacion cu nan ta aden na e momentonan aki.

Edward Maduro, presidente di e sindicato aki, a expresa cu ta na su luga pa anuncia kico ta loke a conduci nan pa yega na e decision di diabierna di siman pasa, unda cu su coleganan di aduana a bay tuma nan oranan cu no ta wordo paga pa motibo di e recorte di salario di 12.6%.

Maduro a splica cu manera nan a compronde for di gobierno, nan no ta bay haya nan 12.6% back di salario. For di e momento ey, sindicatonan a indica cu ya cu nan no por haya e placa back di e recorte aki, nan a dicidi di cuminsa tuma nan oranan liber ekivalente, cu ta bintidos ora pa luna.

Den diferente reunion entre sindicatonan y gobierno, ademas di mediador kende tambe tabata aden, “lamentablemente nos no a logra yega na un consenso cu gobierno” segun Maduro a expresa.

Ademas, Maduro a señala cu na ningun momento sindicato SADA a indica cu esaki tabata un accion di protesta, sino cu, segun Maduro a declara, “mas bien nos ta bay tuma e oranan cu nos no ta wordo paga p’e. Pasobra aworaki den 2022 nos no por ta bibando den sclavitud mas, trahando por nada pa niun hende”.

Mirando cu nan ta compronde e situacion den cual nan no lo haya e placa di 12.6%, e ora ey “nos no por sigui traha gratis mas, mirando cu e parti di FASE cu Loonsubsidie a pasa y no tin ningun motibo pa ta solidario cu niun hende”, Maduro a expresa.

Esaki a conduci cu nan a convoca un reunion extraordinario dia 1 di februari ultimo cu miembronan y no miembronan di e sindicato, unda cu Maduro a bisa cu nan a haya un asistencia masal na hoofdkantoor. Durante e reunion, nan a splica e situacion, e bintidos ora cu nan ta trahando gratis pa luna. Pero tambe cu na momento cu a manda e invitacion pa e reunion, nan a hacie na esunnan cu ta miembro y no miembro, pa loke e dia ey cuerpo di Aduana, parti di staff y director tambe tabata presente y nan a firma e lista di asistencia.

E dia ey nan a palabra cu nan lo a pidi un reunion cu director y management team pa asina conhuntamente nan por yega na un manera responsabel pa tuma nan oranan sin cu esey bay a costo di e servicio cu cuerpo di aduana ta duna – y nan a bay di acuerdo.

Maduro tambe a bisa cu e mesun dia ey nan a manda e peticion na e director, pa asina sinta y palabra con nan lo yega na un cooperacion pa economia no bay sufri y pa servicio di aduana no bay wordo perhudica. Dia 2 di februari nan a tene un otro reunion cu sindicato SEPPA y full management team di director, unda Maduro a expresa cu nan a considera e momento ey “historico”. “Pasobra den mi 22 aña den servicio, ami nunca a mira un reunion entre sindicato cu full e management staff y director di cuerpo di aduana. Y mas ainda mirando cu e causa ta comun, den sentido cu tur hende ta consciente cu nos ta trahando por nada 22 ora, y tambe tur hende tabata consciente cu nos no kier afecta e servicio di cuerpo di aduana”, Maduro a bisa.

Un siman despues – segun Maduro a indica – ora nan mester a haya e parti di colaboracion, e director a cambia su manera pa 180 grado. “Unda cu nos a keda straña y babuca compara cu e reunion di dia 2 di februari, unda cu el a keda para den un punto intransigente na un manera cu e no ta interesa den nos concepto pa bin cu samenwerking pa servicio di aduana no wordo afecta”, el a sigura.

E situacion aki a conduci na otro reunion dia 16 di februari pa asina nan duna un splicacion riba e situacion, ora nan a trece dilanti cierto puntonan, e miembronan a indica cu awor esey ta keda na e director su opinion. “Pero e ora ey e mester carga tur e consecuencianan cu lo bin cune si den dado caso, ora cu cuminsa tuma e oranan, e bay di un manera cu no tin control riba dje”, Maduro a comenta.

Di mesun manera, Maduro a manifesta cu diahuebs ultimo nan a manda un e-mail na e director den cual nan a informa e puntonan di e miembronan, unda cu nan a bisa cu “director ta keda responsabel pa cualkier daño cu por wordo haci si dado caso miembronan ta tuma e oranan, unda cu ademas den un circular di minister presidente, director mes a indica cu no mester permiso pa tuma e oranan”, el a bisa.

Ademas, nan a compronde cu diabierna ultimo un gran parti di servicio di Aduana a wordo afecta pa motibo cu “coleganan a tuma nan oranan cu nan no ta wordo paga p’e y eynan nos a bin haya sa cu tabatin basta servicio of seccion di Aduana cu tabata plat of semi-plat” Maduro a expresa.

Diabierna ultimo den oranan di atardi nan a haya un yamada di Directie Witteveen unda cu nan a informa cu nan ta bezig lantando un caso sumario contra sindicato, door cu nan tabata den accion. Y den caso cu sindicato lo a bisa cu nan lo no stop, nan ta bay pidi hues un orde van maatregel.

Segun Maduro a bisa, SADA no tabata den accion, sino solamente ambtenaarnan den nan totalidad, conforme e circular di minister presidente cu el a manda dia 1 di februari, tabata haciendo uso di nan oranan cu no ta wordo paga.

Diasabra ultimo, manera Maduro a indica nan a haya un yamada di Corte unda nan a compronde cu Pais Aruba a entrega un solicitud pa un orden van maatrefel contra SADA, unda cu hues a puntra na sindicato si nan ta dispuesto pa stop e accionnan boluntariamente prome cu mester dicidi riba un orde van maatregel. Nan a informa cu SADA no tabata den accion, sino cu nan tabata cumpli cu e comunicado di minister presidente.

Pa cu esaki, directiva a discuti cu mirando cu hues a pidi na nan pa coopera den cierto sentido pa pidi e miembronan pa warda riba e sentencia di SIMAR cu SEPPA, SADA a dicidi di warda riba e decision di hues den e casonan aki menciona.