Sindicato SEPPA a reacciona riba cu un circular di Gobierno (DRH no. 673/17 cu fecha 22 mei 2017) den cual como dunado di trabao, gobierno ta desconoci ‘waterpokken’ of bruela como malesa contagioso.
Pa atende cu e discusion aki, SEPPA ta referi na 3 articulo tanto di LMA como e Areglo di Vakantie en Vrijstelling van Dienst, cu nan ta considera importante pa mira na unda e falta di reconocemento aki ta afecta e empleado publico. Di su banda e sindicato kier trece claridad ya cu nan ta haya cu tin un confusion enorme den e asunto aki; of ta purba di desvia e berdad door di bruha e articulonan aki den otro.
Den LMA- Articulo 51 (ta regla Vrijstelling v.Dienst) y aki den e ta bisa: “Den caso cu un persona, cu ta biba na e mesun parcela cu e ambtenaar of a biba eyden por lo menos 14 dia prome, y ta sufri na algun malesa (describi den e articulo) e.o. Pokken of na otro malesa indica den un LB-ham bao cual e stipulacionnan den e “Landsverordening Besmettelijke Ziekte” ta aplicabel, ta prohibi na e ambtenaar forma parti di su luga di trabao. E ambtenaar ta obliga pa asina cu e tuma nota cu na e parcela tin un malesa manera indica, pa mas pronto posibel informa su hefe.
Y den caso cu e hefe tuma nota di e malesa cu por ta un peliger pa e luga di trabao, e por prohibi e ambtenaar pa subi tereno di trabao, SEPPA ta indica. “Berdad ta cu e no ta bisa as such waterpokken, pero durante añanan a reconoce esaki si ora di duna liber pa motibo di bruela”, segun e sindicato.
E virus di bruela ta den aire, ta surgi di cualkier momento y/o encuentro. Pues cualkier encuentro cu un persona infecta por afecta un persona, e sindicato ta sigui splica. E problema di bruela ta bolbe surgi na scolnan.
