Relaciona cu e caso di fraude cu ta investigando na laboratorio di hospital, Caribisch Netwerk a publica recientemente un articulo pa cual a entrevista Gina Maduro, President di sindicato di enfermeronan. Den esaki, e sindicalista ta transmiti kehonan ricibi di intimidacion riba trahadonan di e departamento en cuestion.

E articulo ta relata con manager di e fundacion FSLMA cu ta maneha, entre otro, e laboratorio di Dr. Horacio Oduber Hospitaal (labHOH), a ser pone como ‘non actief’ den e investigacion pa posibel fraude cu testnan. R.B. lo a manda e testnan aki pa un compania na Hulanda, pero e compania ey ta registra na su adres di cas na Delft.

Mas leu ainda, e paptestnan aki tabata keda finalmente na Aruba pa ser analisa dor di patologo M.L., kende tambe ta ‘non-actief.’ Un fuente anonimo a bisa cu ta trata di rond di 2.600 muestranan tuma for di october di aña pasa. Hospital lo mester a paga 19 euro pa cada un, na luga di 15 Florin, cual ta haya esaki paga bek.

Segun sindicato di enfermeronan, ABV, ta existi un mal ambiente di trabou for di hopi aña caba. “Intimidacion na man di gerencia, un presion mas halto dor di falta di personal, y un orario no saludabel di trabou,” asina Gina Maduro a bisa como e President di e sindicato. Mayoria di e personal di laboratorio ta miembronan di ABV.

Maduro a bisa cu despues cu e noticia di e fraude a sali den prensa, “empleadonan tin ainda mas miedo di habri nan boca, pa evita di wordo kita.” Den declaracion di e sindicalista na CaribischNetwerk, el a indica ademas cu “Nan tabata haci pregunta riba e proceso cu a kibra cerca cierto pruebanan. E pruebanan ey mester a wordo poni di inmediato den un envelop y manda. Nan no tabata haya esey algo safe.” Pero no tabatin prueba di cosnan robes, Maduro ta conta, te ora cu e publicacionnan a bin. “E ora ey e kwaartje a cay pa nan tambe. Pero nan ta haya ainda mas intimidacion y nan tin prohibi pa papia di esey.”

Mientrastanto, Director di Hospital, Ezzard Cilié ta dirigiendo e laboratorio, Maduro a bisa. E tin hopi critica tambe riba e directiva y e Hunta di Supervision. “Nos a adverti nan hopi tempo pasa. Ora cu na januari 2017 a tuma B. na trabou, nos a bisa cu e no tabata adecua como manager.” Sindicato ta sinta tur luna na mesa cu directiva caminda ta trece dilanti e kehonan di personal. “Ta mustrami manera cu nan tabatin man pone riba su cabes.”

Ken a descubri e fraude?

Nico van der Zee a publica esaki pa prome, den su columna den corant Amigoe. Su casa, cu ta traha na e fundacion di e laboratorio a ripara e consecuencia di su publicacion. Aunke e ta haya apoyo di su coleganan, e ta wordo intimida dor di su superior y pesey e tin un siman na cas caba.

Mientrastanto, directiva di Hospital (cu ta directiva di e laboratorio tambe) a anuncia cu, despues di un investigacion preliminar y un ‘fact finding’, awo lo realisa tambe un investigacion forensico. Ta alega cu tin ‘indicacion di posible violacion di integridad.’ E investigacion ta enfoca su mes riba e seccion di patologia y pruebanan haci dos ‘un compania Hulandes.’

E fundacion di laboratorio FSLMA ta existi for di 2015 como sucesor di e Landslaboratorium moribundo cu gobierno a rechaza. Landslaboratorium a keda cuestiona caba na 2007 dor di un fraude di 10 miyon florin pa cual 3 empleado tabata involucra.