Pa mas di un aña, sindicato ABV ta purbando pa keda cla cu tres punto pa logra e CAO, cual ta e partinan kibra di aña di warda, orario anochi, pa esunnan 50+ no traha mas warda y seguro di enfermedad (AO). Tambe e falta di personal den hospital.

Gina Maduro, presidente di sindicato ABV, a splica cu esey ta e proposicion di Collectieve Arbeidovereenkomst (CAO; convenio colectivo di trabou) cu a manda Raad van Bestuur. E ta bisa cu e parti di AO ta importante pa firma na 2018 cu persona cu ta cay pa temporada largo malo por cay bou remarca pa AO, cu ainda no tin e.

“Nos a pone como exigencia, mientras tanto cu hospital no cera e seguro, no ta firma e CAO. Nos a pone riba mesa caminda mester tuma decision ribaa tres punto pa keda cla”, Maduro ta splica.

E motibo cu a tarda ta pasobra e director financiero a bay cas, ‘nos no sa e rason’. Despues a bin otro comision y a sigui cu reto pa locual ta trata e parti financiero. Maduro ta laga sa cu esey a trece disgusto cerca e trahadonan. A pidi pa keda cla cu CAO pa mey september, pero awo lo mester warda pa mey/ final di october ‘pa por cera e CAO aki’.

Unda cu tin stapel grandi di aplicacion pa ImSan, otro trahado ta solicitando pafo di Aruba. Esunnan hoben no ta acepta cierto cosnan cu nan ta pasa mirando e situacion di hospital. “Nos a ripara ultimo tempo cu ta bayendo ImSan, cu tin miho beneficio cu hospital mes. Nos mes ta sindicato di ImSAn cu a negosha CAO, nos sa precisamente kico tin y no tin. pPero ta purbando pa cera e buraco.”

Maduro ta bisa cu gran diferencia di ImSan ta cu e ta un compania chikito di 190 empleado den comparacion cu 1.100 empleado di hospital; tambe specialista cu ta den loondiesnt. Pa es motibo Maduro ta splica cu ta dificil pa cera un CAO na hospital.

A puntra Maduro si e falta di personal ta bin den tur departamento di hospital of algun parti. El a contesta cu e falta ta mas di enfermeronan. “Eynan e reto, locual nos mes a constata cu recientemente hospital a busca como 20 Filipino di afo pa bin reenforsa. Nos no tin nada contra esey. Hospital ta draai cu stranhero. Nos no tin e manpower Arubiano pa draai henter un hospital.”

Locual si Maduro a bisa ta cu a señala y bisa gerencia cu nan no tin ningun problema pa busca hende di afo y trece Aruba, sinembargo zorg pa local tin trabou. Esaki pa motibo cu 2 pa 3 persona a acerca Maduro splicando cu nan solicita cu nan diploma di enfermero local y nan no a haya trabou, pues ‘esey ta un problema’.

“Mi no ta kere nan por nenga un local bisando cu vacatura ta yen y ta duna espacio na 20 persona di exterior. Sabiendo cu tin local cu por haci’e. Mi a wak reciente den media cu minister Lampe a firma convenio entre hospital cu EPI, anto esey por yuda cera e buraco pa asina ora un persona caba EPI por drenta den servicio di hospital”, Maduro a splica.

Di profesionalnan stranhero cu ta bin, ta keda pa un tempo limita, pero 1 pa 2 aña ‘e por bira onbepaalde tijd’; esey ta si nan ta traha bon, mester di hende y si nan gusta Aruba nan ta keda.