Mediante un comunicado di prensa di Horacio Oduber Hospital dirigi na medionan di comunicacion a wordo informa cu pa seguridad di personal y pashent a muda departamento di Opname temporalmente.

E comunicado aki ta indica cu durante varios dia caba e departamento di Opname di Horacio Oduber Hospital ta sinti molester di e construccion cu ta andando. Pa motibo di seguridad a dicidi di muda e departamento aki temporalmente na e edificio di MOB, esta e Medical Office Building cu ta e prome edificio di 2 piso cu ta topa ora subi tereno di Hospital. Pues, desde dialuna 25 di april nan lo ta ubica den nan localidad temporal na edificio MOB.

Di mesun manera nan a informa comunidad cu si algun persona mester acudi na departamento di Opname, cu pronto lo mester wordo admiti na Hospital pa un operacion por fabor tene cuenta cu e cambio aki.

Di mesun manera, diabierna mainta sindicato AVB representante di varios trahado di hospital a dicidi di haci un walkout contra e compania cu ta haciendo trabao di renobacion na hospital, pa cu esaki, presidente di e sindicato aki Gina Maduro a ofrece su declaracion tocante e situacion cu a bin tumando luga for di algun tempo caba.

“Constantemente nos tin problema, den cada fase nos sa cu tin problema, unda cu nan ta bisa cu nan ta tene na cuenta cu cierto cosnan pero recientemente nos ta na departamento di Opname unda e pashentnan ta bin registra pa keda na hospital y tambe unda nan ta bin pa haci areglo di pago, nos a constata for di diamars ultimo cu door cu nan ta construi ariba e blokinan ta bin te abao y na unda cu logicamente trahado y pashentnan ta sinti nan onveilig y nos a trece esey dilanti”, Maduro a indica.

Di mesun manera, el a splica cu nan a papia cu Raad van Bestuur di e situacion aki na unda cu nan a tuma e decision pa papia cu SOGA, e compania cu ta encarga di renobacion di hospital pa asina ey pa stop e trabaonan na e parti ey un rato pa duna oportunidad na e departamento e chens pa muda, pa asina ey nan por continua cu nan trabao.

“Pero kico ta pasa? Ta parce cu SOGA no tin grip riba e contratista, e contratista ta keda haciendo su trabao na unda cu hospital aworaki no por garantisa seguridad ni di pashent ni di trahado den area aki so”, Maduro a señala.

Pa e motibo ey a dicidi di stop e trabaonan na parti di abao pero ta parce con contratista ta sigui haci nan trabao pa loke Maduro a dicidi di tuma accion y a bisa “ta basta, pasobra nos trahado no por traha bao stress bao un tension pa wak si un bloki ta bin abao of no dus p’esey nos a bisa ta basta y nos a saca nos trahadonan un rato pa mustra nos mal contento di e trabao aki”, el a sigura.

Ademas, el a bisa cu ta e compania SOGA esun cu no tin grip riba e contratista, pa motibo cu segun Maduro a sigura “ta SOGA cu Hospital a manda su red flag caba bisando cu nan no por sigui den circunstancianan asina y esey ta loke sosodiendo, SOGA a bisa e contratistanan pa nan stop, pa duna oportunidad pa nan muda, pero e contratista ta keda haci su trabao”.

El a declara cu na e parti di abao nan ta tende di trabaonan di boramento constantemente, unda cu Maduro a expresa cu contratista ta sigui haci e trabao “manera nan kier”.

Tambe, el a bisa cu nan a acudi na nan dunado di trabao, e dunado di trabao di dirigi su mes na SOGA y SOGA ta dirigi su mes na e contratista, “nan tin e informacion y nan sa cu nan mester stop, pero nan ta keda insisti cu nan ta keda traha bao tur e circunstancianan y a nos como sindicato nos tin nos miembronan trahado eyden na un sitio insigur y nos a dicidi di saca nan afo, pasobra bo no por keda traha den circunstancianan asina”, Maduro a splica.

Stichting Onroerend Goed Aruba conoci como (SOGA) ta e compania encarga di trabaonan di renobacion di hospital for di algun añanan caba unda diferente incidente a tuma luga na hospital for di e momento cu a cuminsa tuma luga e renobacion.