Pa e parti di gobernacion tin un gamblemento di loke ta trata e medida cu mester wordo aplica y cu no a wordo aplica ainda. Tur esaki ta pa scapa cara politicamente pero por mira cu e pais ta biniendo abou, segun president di sindicato STA, Sr. Diego de Cuba.
Segun e president di STA, den 2015 e sindicato a pasa den e problema cu nan a wordo neglisha pa e president di Parlamento Sra. Marisol Lopez-Tromp. E sindicato ta considera e acto aki uno como terorismo contra sindicalismo, pasobra e sa cu sindicatonan ta representa trahadonan di Aruba. Sr. de Cuba a sigui bisa, cu president di Parlamento a opta pa no topa cu nan, pero a opta pa e CAFT. Awor ta sinta aki cu hende den cas propio kende ta controla kico tur ta wordo haci.
“Si bo haci mala mucha, bo ta haya faha tambe. Y ta locual Sra. Lopez-Tromp no ta compronde, aunke cu e ta sostene e pensamento di e toezicht aki di parti di CAFT,” Sr. de Cuba a indica. “Pero nos ta bisa cu esaki lo no tabata necesario si e maneho di gobierno tabata manera debe ser,” e ta bisa.
Parlamentario mester vigila
Hopi hende ta lubida cu Parlamentario, sea ki color cu bo ta, pero bo ta sinta den Parlamento, pasobra e ta vigila e gobierno di e pais. “Mi no por ta sinta den Parlamento y mi no por ta autocritico. Mi mester por critica mi propio partido cu ta den gobernacion y mi mester por yuda mehora e gobierno,” e president di STA a bisa. E sindicato a ripara cu aki na Aruba ta un tendencia “ta mi partido ta eynan y mi no mag critica e.” Esaki ta algo cu no por. Hendenan tin cu bay cambia nan mentalidad. “Si mi ta sinta den sala di Parlamento ey, mi ta representa henter e pueblo di Aruba. Mi no ta representa mi partido politico so, mi ta representa henter e comunidad Arubano,” e president di STA a bisa.
Bira mas humilde
Esaki ta loke hopi hende ta lubida y nan ta haya capsonne. “Mi ta kere Sra. Marisol Lopez-Tromp a haya un idea awor akinan cu e mes ta Dios,” e ta indica. Sr. de Cuba a mira un par di cos cu a pasa den Parlamento algun dia pasa, tambe el a tende kico e president di parlamento a bisa den prensa. “Mi tin di bisa cu e tin cu cuminsa baha for di e nubia ey,” e sindicalista a bisa. President di Parlamento mester cuminsa bira mas humilde, pasobra locual el a haci no ta na su luga. Di biaha por mira como un presidente di Parlamento, e ta actuando completamente for di sla. Y cu ta pone un polis para tras di un Parlamentario, un lider di fraccion den sala di Parlamento, e sindicalista ta haya cu esey ta bergonsoso y hopi humiyante y un intimidacion di marca mayor.
No ta confia den president di Parlamento
“Cosnan asina aki como un presidente di Parlamento, bo ta gewoon beklem toon cu bo no ta sirbi como presidente di Parlamento. Pa sindicato STA, y esaki no ta conta pa sindicato STA so, sino ta conta pa e otro sindicatonan, cu el a tuma nos di haci ora cu nos a bay protesta dilanti di sala di parlamento, el a keda di atende nos y despues no mas,” e ta indica. Pa e sindicato, ta un afgedane zaak cu Sra. Marisol Lopez-Tromp y no tin confiansa mas den dje. Pio loke ta pasando.
