Hulanda a pone den e landspakket cu nan kier bin cu un estudio pa revisa den cual compania estatal nan ta kere cu un gobierno mester participa como doño y cual no.

Den e caso aki, nan ta referi na e companianan di utilidad cu mester keda den man di gobierno, ya cu henter comunidad ta depende di dje. Pero talbes tin otro companianan estatal cu no necesariamente mester ta asina.

E tipo di proposicion aki no a cay den bon tera cerca e lider sindical di e compania estatal di WEB (SIWA), Erick Henriquez. E ta haya cu nos compania di produccion di awa y coriente ta un role model den nos region Caribense. Te hasta recientemente gobierno a pidi pa un compania di afo haci un audit y nan resultado tabata uno ‘tremendo’, segun e sindicalista.

E no ta nenga cu tin asuntonan den e compania cu mester drecha. Sinembargo SIWA ta haya cu mester para keto un rato pa no laga companianan estatal cu ta bayendo bon cay den man di otro.

“Si nan kier bini pa wak con nos ta draai, nan ta welcome. Nos no ta bay core pa esey, pasobra nos no tin nada di sconde,” el a bisa. Te hasta si Hulanda kier duna recomendacion pa nan por bira miho, SIWA no ta wak problema den esey. Pero pa bay bende e tipo di compania aki cu ta genera ganashi y cu gobierno tin participacion den dje, esey si e ta haya cu Hulanda kier bay mucho leu cune.

P’esey Henriquez a declara na Bon Dia Aruba cu nan preocupacion ta grandi, mirado e tipo di estudio cu Hulanda ta propone na gobierno di Aruba riba companianan estatal. E sindicato nan preocupacion ta cu e placa cu e compania aki ta produci ta bay ‘perdi’. Ademas nan ta alrededor di 310 trahado na servicio di e compania di utilidad aki.

Henriquez ta haya cu companianan manera WEB y otronan ta duna un contribucion pagando dividend na e pais. Pero tambe e loonbelasting, pues nan mester keda compania estatal di gobierno. Ademas na momento cu un compania ta duna participacion na un tercera parti, nan ta haya bo cu nan tambe tin cosnan pa bisa den e compania, locual ta algo logico.

Sinembargo e sindicalista a bisa cu nan a haya un bon contesta for di prome mandatario cu a trece un poco di trankilidad cerca nan. Ya cu segun e mandatario ta trata di companianan estatal cu gobierno tin cu hinca placa den nan pa draai. Mientras compania manera WEB ta net al contrario.