Awe 25 aña pasa, riba prome edicion di Bon Dia Aruba, sr. Anselmo Pontilius cu e tempo aya tabata lider sindical di FTA, a expresa su preocupacion riba sindicalismo na Aruba cu no tabata funciona bon.
E tempo aya el a referi riba necesidad di proyecto pa conscientisacion di e trahadonan, problema interno den e sindicatonan y falta di aceptacion di e sector comercial riba desaroyo sindical. Cinco lustro despues y awor den su funcion como Mediador di Gobierno, sr. Pontilius a indica cu tin cambio positivo, pero ainda algun problemanan di pasando ainda nan t’ey keto bay.
Panorama sindical
E ta haya cu compara cu 25 aña pasa tin mas sindicato cu a wordo funda cu no tabata t’ey e tempo aya. Pa varios rason e sindicatonan a bini, entre nan considerando cu e ta un derecho di e trahadonan. “Cualkier grupo di trahadonan por bisa, mi ta bay funda mi mesun organisacion, uno pa motibo cu kisas mi no a haya e servicio cu mi a spera…”, el a bisa.
E ta considera importante mas cu nunca cu e organisacionnan di trahadonan ta cumpli cu statutonan y reglamento di un organisacion. E ta un aspecto importante –segun sr. Pontilius- pasobra esey ta existencia tambe di organisacion. Tambe e dirigente mester informa debidamente na su miembro riba e actividadnan cu ta tumando luga paden di e organisacion.
Conscientisacion
“Pero e debilidad cu el a mira 25 aña pasa t’ey ainda sigur”, el a bisa. Como Mediador di Gobierno a wordo haci varios intento pa no solamente pa señala e debilidad sino riba kico nan lo por haci. Nan ta purba di percura algun fondo pa bin cu programanan di formacion tanto pa e representante di e trahadonan, e dirigentenan principal, y delegadonan, pero tambe e dunadonan di trabou. E ta haya cu e programa di conscientisacion di e tipo aki mester bin structural. Mayoria di e organisacion sindical no tin un programa structural di tur aña pa duna miembronan informacion, preparacion na nan dirigentenan. Mayoria di e organisacion ta limita na recurso financiero y humano. Ya cu e ta haya cu e tarea di sindicato no ta exclusivamente negosha un contracto colectivo (CAO),sino cu e tin mas cu haci ya cu e tin un rol pa vigila e proceso democratico di nos pais.
Problema interno
Encuanto e problema interno entre sindicatonan, sr. Pontilius a señala cu e sindicatonan a purba durante e 12 lunanan ultimo di crea un unidad di lidernan. “Mi ta kere cu e ta canando. E no ta canando facil, ya cu cada organisacion tin nan retonan…”, el a bisa.
Sindicalismo y sector comercial
Pa loke ta sector comercio su aceptacion cu desaroyo sindical, sr. Pontilius ta haya cu “ainda tin dunado di trabou cu ta mira e sindicato como un enemigo, y esey ta incorecto ”. E ta bisa cu den nos Constitucion di 1986, sigur ta consagra cu e libertad di scoge pa wordo representa pa un sindicato ta un libertad cu no tin niun discusion riba dje. “Mi ta kere cu gran cantidad di dunado di trabou lo por bisa bo cu mas y mas e dialogo entre e dirigentenan sindical y e dunado di trabou mester ta uno na un nivel di respet mutuo…”, el a bisa.
Sr. Pontilius a probecha e oportunidad aki pa expresa su palabra di pabien na e dirigentenan di Bon Dia y tur personacu ta labora den e media aki. E ta haya cu 25 aña di existencia di e media aki ta un logro hopi importante, ya cu hopi corant ta bin y despues ta disparce. E ta considera cu no ta un tarea facil pa percura practicamente tur dia di siman pa produci un corant. “Bo tin un trabou enorme cu hopi hende kisas no ta realisa, pero e ta un trabou intensivo pa produci mainta tempran un corant”, el a bisa.
