Sindicalismo riba bon caminda?

Dia 1 di mei ta mundialmente e momento den aña pa reflexiona riba e balor cu trabao tin den nos comunidad, manera den cualkier comunidad. Sin trabao no tin produccion. Bo por tin tur capital posibel, tur instalacion o ekipo pa produci, sin hende pa haci e trabao no tin nada. Esey no ta asina solamente den e epoca industrial, pero ta inherente na sobrevivencia di e especie: si no tin trabao, no tin cuminda, y tur lo demas cu nos lo ta desea di tin. E indigenanan den selva di Brasil, cu no conoce placa, ni forma industrial di produci, tampoco por sinta keto y warda cuminda cay for di cielo.

Pero den e sociedad den cual nos ta biba awendia, trabao ta organisa mayoritariamente como algo paga, unda e empleado ta duna su tempo y ta haci e trabao acorda, pa un cierto prijs (salario), hunto cu e otronan cu ta den igual situacion. For di tempo atras, cu tabatin abuso general di e trahado na man di esunnan cu tabata contrata nan, a surgi e sindicato como forma di organisacion di defensa di interes di e trahado. Pero e bataya no tabata riba tereno sindical so. Tabatin un lucha feroz riba tereno politico, cu a duna bida na diferente proyecto socialista/comunista, unda na nomber di e trahado a conkista e poder politico absoluto, buscando e soño di e estado unda ‘pueblo’ tin e poder absoluto, cu den practicamente tur caso a fracasa.

Pero tabatin esunnan cu a busca otro rumbo, uno di pacificacion di e relacion entre capital y labor. Por cierto otro aña lo celebra e di 100 aniversario di e organismo cu a duna bida na loke awe ta International Labor Organization (ILO). Den tempo di pleno confrontacion violento entre extremonan politico, y cu e experiencia di e Prome Guera mundial cu a termina algun tempo prome, como parti di e Tratado di Versailles, a pensa cu tabata imposibel pa tin paz duradero, si no tin paz laboral. Desde e tempo ey ta existi e intento, sin pretende di deshaci di e contradiccionnan, pero di mantene un ambiente di negociacion, a base di respet pa e contrincante, y yega na convenio, sanciona internacional, encuanto condicion di trabao.

Y na nos pais, unda nos sindicatonan ta para na aña 99 di ILO? Nos ta conta cu un sector priva, unda un parti chikito di e trahadonan ta organisa via un sindicato. Y cu un parti grandi di trahado inmigrante, legal o ilegal, ta existi e posibilidad di abuso sin cu ta mira un eficacia adecua di e entidadnan gubernamental cu tin tarea legal di supervision. Pero nos ta laga esey pa discuti na un proximo oportunidad. Nos tin un sector publico cu un sinfin di sindicato, cu ta mustra miho organisa cu e sector priva. Esey ta duna un cierto desbalansa na deliberacion ‘tri partite’ unda e parti chikito di empleado publico ta hopi miho representa cu e parti priva, cu ta casi 10 biaha mas grandi. Sin embargo, esaki no ta algo cu e otro partidonan por haci algo cu ne, representacion di empleado di sector priva ta loke e ta.

Un aspecto hopi importante ta sin embargo, y esey no ta depende di representacion grandi of no, ta e capacidad di negociacion. Aki nos ta mira cu tin cierto aspecto cu merece mehoracion. Un di nan ta cu como sindicato bo mester negocia a base di respet pa e otro banda, cu tambe ta mara na e mesun normanan ey. Vocifera cu e principal negociado na otro banda, e director di e empresa, mester bay, y cu nan mester nombra otro, ta parce nos ‘one bridge too far’. E reglanan fundamental di e wega aki no ta permiti pa scoge ken ta sinta na e otro banda. Nos ta mira na e otro banda ey tambe cosnan cu no por, manera ignora un sindicato cu a gana referendum y por lo tanto ta representante legitimo di e trahadonan. Eligi sindicato den referendum ta asunto stipula adecuadamente den ley y no tin pakico pa no atene corectamente na e reglanan di oro aki. Nos ta mira un cierto deterioro di e normanan cu ta bay cumpli 100 aña, sin cu nos ta tende o lesa cu esaki no ta e manera di trata otro.

Finalmente, algo tocante e situacion na pia di trabao. Nos ministro encarga cu labor a declara cu e situacion pa loke ta peligro y accidente na trabao no ta manera e mester ta, y nos ta comparti e opinion ey. Por yega na miho registracion, sigur, pero prome cu tur cos ta importante di por conta cu e palabra magico atrobe: prevencion. Aki ta unda e actual supervision ta fayando, unda cu inspeccion di labor tin tarea meramente administrativo, y no ta ekipa y educa pa señala situacion peligroso ora ta haci inspeccion. Prome cu core crea otro departamento nobo cu personal pa e tarea specifico aki, ta importante analisa prome con ta bay integra e tarea neglisha aki. Mester corda cu nos ta den tempo di guera, guera contra gasto excesivo di gobernacion, y e efecto dañino cu esaki tin riba economia. Atrobe, common sense no tin substituto.