Dutch Caribbean Nature Alliance (DCNA)su prome Big Live Nature Quiz recientemente a marca e start di un manera placentero, nobo y creativo pa debolbi y gara atencion di hobennan pa medio di siñamento via internet tocante naturalesa den Hulanda Caribense. Siman pasa,24 team di 1-4 hoben di 11-14 aña di edad di Aruba, Boneiro, Corsou, Saba, Sint Maarten y Statia a competi cu otro den un live cues online. Despues di hopi tanda di pregunta tocante naturalesa, den un cues cayente cu suspenso un team na Saba a gana. E di dos luga a bay pa Sint Maarten y di tres luga pa Boneiro.

Dutch Caribbean Nature Alliance (DCNA), un ret di contacto regional di areanan proteha, cu a lanta pa asisti e Organisacionnan pa Maneho di Areanan proteha na e seis islanan, ta sostene entre otro programanan di educacion di naturalesa. DCNA su Evento anual di Intercambio di Junior Ranger, pa trece hobennan di e seis islanan di Hulanda Caribense hunto riba un isla pa siña di naturalesa di otro, desafortunadamente a keda cancela e aña aki pa motibo di e crisis di corona. Sinembargo, pa contraresta e circunstancianan di e aña aki cu positivismo, a crea e Big Live Nature Quiz pa por hisa e sosten na e empleadonan di educacion di naturalesa i tambe pa tene e hobennan den un situacion safe na nan respectivo islanan.

E kues live y interactivo tabatin preguntanan tocante topiconan manera Flora y Founa, Ecosistema, Adaptacion na Clima y Durabilidad preguntanan tocante e Parke Nacional nan di Hulanda Caribense cu ta maneha pa STINAPA na Boneiro, CARMABI na Corsou, Fundacion Parke Nacional Aruba, Saba Conservacion Foundation (SCF), STENAPA na Statia y Nature Foundation Sint Maarten (NFSXM).

“Nos ta hopi orguyoso di e muchanan cu a partisipa. Tabata tremendo pa mira e hobennan entusiasma di rond di Hulanda Caribense, pero mas importante ainda esaki tabata un gran oportunidad di siñamento, pa por a siña di e otro islanan y nan naturalesa. Nos ta ansioso pa haci e evento aki di nobo den futuro!” Tineke van Bussel & Dahlia Hassell, kendenan tabata e organisadonan di DCNA su Big Live Nature Quiz a declara

Na Boneiro hobennan di Jong Bonaire y Junior Rangernan di Stinapa a bini hunto na Jong Bonaire. SCF y Saba Nature Education a organisa hunto un evento na Long Haul. Na Sint Maarten NFSXM tambe a trece nan Junior Rangernan huntu. Na Statia STENAPA tabatin hobennan di Golden Rock Roman Catholic School y Bethel Methodist School hunto. Fuera di e gruponan aki, tabatin tambe hobennan cu a participa for di nan cas. Nos ta hopi agradecido na tur envolvi cu a duna e hobennan oportunidad pa participa.

Un Caluroso Pabien ta bay pa e Timnan Ganadó! E team ganado di Saba pronto lo bay haci un paseo di snorkel y sambuya y e otronan lo ricibi un T-shirt cu e logo. DCNA tin como meta pa bay haci esaki un evento di cada aña, cu e probabilidad cu e ta bira un actividad pa adulto tambe. Pues si bo a perde e oportunidad aki, tene e canalnan di medionan social di DCNA na bista y nos ta contento di mira bo e siguiente biaha!

DCNA su Big Live Nature Quiz: live na studio cu presentando Sander Teeuwisse den interaccion cu e hobennan rond Hulanda Caribense.Saba: e ganadonan na prome luga di e Big Live Nature Quiz. Sint Maarten: cu a e ganado na di dos luga di e Big Live Nature Quiz.Boneiro: ganadonan na di tres luga di e Big Live Nature Quiz