Siña mantene loke tin… Un tarea lubida…?

Porfin Cuerpo Policial lo haya un lugar decente di trabao, al menos, esey ta loke ta e promesa. E edificio cu mas di 20 aña pasa tabata un ruina caba, definitivamente lo no us’e mas. E edificicio na otro banda di caminda, igualmente no apto pa e cuerpo, tambe ta keda descarta. Por constata cu porfin un mandatario di husticia ta tuma rienda di e asunto aki, loke ta di aprecia, pero na mes momento ta duna di pensa ta kico su predecesornan tabata pensa y haci encuanto e asunto, nada drechi ni concreto en todo caso. Realmente no por comprende con e cuerpo a funciona asina tanto aña den e situacion cu tabata sin mas un insulto, sin cu nan a subi caya pa bisa e gobierno di e momento cu “ta basta”. Den e mesun cantidad di aña ey regularmente tabata tende di malcontento den e cuerpo, pero semper pa un motibo o otro tabata trata di otro asunto, riba cual semper tabatin diferencia di opinion si esnan cu tabata protesta o murmura, tabatin razon si of no. Si nan a pone un ultimatum pa gobierno tanto aña pasa pa e asunto aki, anto gran parti di opinion publico lo no a tuma nan na malo. Pero enfin, cada gremio o sindicato ta scoge nan prioridadnan den atende nan interes.

Ta bon cu den e caso aki e dos partidonan grandi no mester di critica otro, pasobra den transcurso di aña nan tur dos a faya barbaramente den cumplimento cu nan obligacion, esta pa percura pa un lugar adecua pa cuerpo policial funciona. En todo caso, e actual plan ta ‘long overdue’ y ta di spera cu e asunto no keda pega atrobe den promesa y anuncio di bon intencion. Si nos mira e asunto aki bon, e ta un di varios ehemplo cu nos tin di negligencia en grande di diferente gobierno tras di otro cu no ta haci loke cualkier gobierno mester cuminza haci: e tareanan ‘normal’ di tur gobierno: percura pa e infrastructura adecua pa gobernacion por funciona, na beneficio di publico en general.

Den mesun sentido nos ta contempla otro anuncio den e dianan aki cu supuestamente mester yena nos curazon di alegria, esta e alrededor di cuatro miyon florin cu ta bay gasta proximamente pa drechi caretera. Aki tambe nos lo mester expresa satisfaccion cu e tremendo anuncio aki? Sin kita merito pa a corda tambe, net na tempo o net laat, riba e careteranan na werki, e pregunta ta naturalmente cuanto caya bo kier drecha cu cuatro miyon florin…? Nos por usa ainda e ‘thumb rule’ di un miyon pa cada kilometer di caminda? Probablemente, pa via di añanan di inflacion, e no ta bay yega pa esey. Ademas, e tarea general ta trata di tanto caminda asfalta nobo, como e parti di reparacion y mantencion. Lo ta interesante pa haya sa anto cu esaki lo ta djis un promer intento pa tene Aruba contento, o cu por bisa algo mas di e totalidad di trabao cu ta warda e departamentonan concerni den e añanan nos dilanti. Segun nos calculacion, ta trata di un inversion di sigur par di cien miyon florin cu mester bay hinca den e aspecto aki so. Tin plan pa esey?

Di tur manera, di un banda ta bon cu ta mira algo ta move y cu despues di hopi aña ta bin reconoce cu e cosnan aki ta e tareanan primordial di tur gobierno y cu ta net riba e tereno aki tin asina hopi cos ta bay robez pasobra negligencia ta e palabra clave pa describi hopi aña di gobernacion, geel of berde. Nos por simplemente referi na e situacion na nos scolnan, proyectonan di purificacion di awa, deterioro den centro di ciudad, tanto Playa como San Nicolas, pa por constata cu si tin algo unda nos mentalidad ‘anti-mantencion’ a penetra, ta den gobernacion desde cu nos a haya gobierno autonomo. Gobierno tin aparentemente e mesun pensamento cu e mecanico di un conocir, cu a conta nos cu el a bay mecanico pa haci checkup regular di su vehiculo y e mecanico a bisa: “Pero pakico trec’e, bo auto no tin problema, toch?” Aparentemente e pensamento cu bon mantencion ta implica cu mester haci algo promer cu e daña, no ta algo comun cerca nos. Anto nos ta rabia cu gobierno pasobra nan ta mescos cu nos? Claro cu nos no ta desea di ofende esnan cu si ta consciente di e importancia di bon mantenimento, pero e grupo ey no ta logra impone nada. Djis tira un vista den e barionan cu na inicio di añanan 50 di siglo pasa a haya vivienda, den un plan ordena cu caya, acera, cura, y riolering. Nan a yega di drecha e aceranan den e añanan despues cu nos a bira ‘baas den nos cas’? Pakico despues cu nos politiconan a tuma rienda for di e ‘Hulandesnan fastioso ey’ casi tur planificacion a largo plazo, incluyendo plan y reservacion di fondo pa mantene tur loke tin, nos no a mira un maneho drechi surgi segun e ehemplo cu nos tabatin, y tin ainda, nos dilanti? Si nos mester kere nos politiconan, nan ta bringando atrobe pa Hulanda reconoce cu ‘nos ta igual’ na nan. Por aplaudi esey, pero esey ta trece cune cu mester cumpli: “noblesse oblige”. Pero, nan ta bay reconoce cu ta pesey mester corta gasto; pa keda cu placa pa cumpli cu nan responsabilidad di mantene? E sapato ey ta keda nan demasiado grandi ainda?

LJMADURO – 17-FEB-2023