Awe Parlamento ta trata e Ley di Ombudsman como un reunion nobo. Esaki segun e Parlamentario Independiente Daphne Lejuez, riba su mes ta algo positivo. “E ta cumpli cu nos Consitucion, articulo 5 inciso dos, ya cu e ta trata un concepto di ley y su memorie van toelichting, esta e splicacion. Esey el a informa Presidente di Parlamento Juan Ady Thijsen ayera.
Sinembargo, ta apenas ayera oficialmente a manda e concepto di ley aki pa tur miembro despues cu e la keda discuti den e comision BCO (Bijzondere Commissie Ombudsman) e dia prome. Y pa Lejuez, ya caba e tabatin hopi pregunta, riba e forma con a hinca e ley den otro.
“E procedura ta pidi pa e Comision haci un relato, entrega esaki na Comision Central y despues comparti esaki cu tur miembro pa asina nan por haci nan preguntanan (si tin) por escrito pa nan por haya contesta,” Lejuez a comenta. “Despues ta yama e reunion publico pa e por keda trata y aproba. Si kier desvia di Reglement di Ordo di Parlamento, e ta rekeri pa tur miembro bay di acuerdo.”
Lejuez a sigui bisa cu e tambe ta “desea pa e ley di Ombudsman keda pasa lo mas antes posibel, ayera mes si tabata por, pero nos no por kibra regla y proceso pa logra esaki, cu sigur lo no ta un bon ehempel pa e inicio di nos Aña Parlamentario.”
Ademas, e ley di Ombudsman lo no por drenta na vigor te ora cu pasa e cambio den Constitucion, cual apenas a drenta den procedura pa por haci pregunta por escrito cu tin como ultimo dia pa haci tal, otro siman dialuna awo. “Pues tin tempo ainda.”
Den otro palabra, ta pasa e ley di Ombudsman sin cu e ta haya su poder formal, mirando cu no a trece cambio den Constitucion. E secuencia ta net contrario. “E lo ta lamentabel si nos como e organo mas halto den nos Pais, ta desvia di tur regla mientras cu ta nos mester duna e bon ehempel,” ta e opinion di Daphne Lejuez.
