E deficit democratico den Reino a tuma un stap riba caminda pa reduccion cu un amienda silencioso na Statuut. For di dia 1 di januari, Hulanda no por sigui malusa su mayoria den Conseho di Minister di Reino pa impone reglanan riba e paisnan fuera di e parlamentonan. Un ley di Reino, proponi 23 aña pasa, pero proclama apenas diabierna ultimo, ta pone fin na e practica aki.

Esaki a keda reporta den un articulo di CuraçaoChronicle.

Riba dia 28 di december di aña 2000, parlamentario Hulandes, Gerritjan van Oven (PvdA) a introduci un iniciativa pa ley di Reino pa retira autoridad di Conseho di Minister di Reino pa forsa cooperacion di administracionnan den partinan Caribense di Reino door di medidanan general di gobernacion di Reino. E tempo aya, gobierno Hulandes no tabata mucho pura pa entrega e poder aki.

Tabata te 2016 cu parlamentario e tempo ey, Roelof van Laar a rebiba e dossier. Pa gana sosten, a haci algun concesion na obhecionnan di e gabinete. Un AMvRB (un medida general di gobernacion di Reino) ta keda permiti den casonan excepcional, pero solamente si tin circunstancianan hopi special y cu un duracion limita.

E iniciativa di ley di Reino a pasa den tanto Tweede Kamer como Eerste Kamer, pero despues a keda para pa añas. Te cu diabierna ultimo, sin un splicacion di Ministerio di Interior y Relacionnan di Reino, e amienda na e Statuut a keda proclama den Gazette Estatal pa un Decreto Real.

Despues di aprobacion di Tweede y Eerste Kamer, e parlamentonan di Corsou, Aruba y Sint Maarten tambe tabatin oportunidad pa pronuncia nan mes riba e asunto. No ta cla si e paisnan a tuma 7 aña, of si Den Haag a alarga e proceso, manera CuraçaoChronicle ta indica. Van Laar ta sospecha cu tabata Den Haag, pa motibo di e consecuencianan: Tur AMvRB imponi anteriormente meste keda converti den legislacion di Reino estableci a traves di e ruta Real – cu opinion di paisnan CAS (Corsou, Aruba y Sint Maarten.)

Ex-minister Ronald Plasterk ya na 2016 a adverti cu e “ley Van Oven” lo duna e ministerionan involucra montañanan di trabao adicional y lo rekeri proceduranan legislativo completo, desde conseho di Raad van State te discusionnan plenario di Tweede y Eerste Kamer cu participacion di delegadonan di e estadonan di Corsou, Aruba y Sint Maarten.

Rey Willem-Alexander a firma un Decreto Real dia 21 di october, sigui casi tres siman despues pa un publicacion den Gazette Estatal. Remarcablemente, no a haci ningun anuncio publico tocante esaki.

Den e publicacion ta indica e cambionan cu a realisa.

Articulo I
 A

Ta modifica Articulo 14 di e siguiente manera:
Ta substitui e prome paragraf pa lo siguiente:

1. E reglanan tocante asuntonan di Reino ta bay keda estableci, na medida cu e materia en cuestion no ta regula den e Constitucion y salvo e disposicionnan internacional y loke ta establece den otro partinan di Statuut, pa ley di Reino of pa reglamento general di gobierno (algemene maatregel van rijksbestuur, AMvRB) cu no ta basa riba un ley di Reino y cu tin un duracion maximo di dos aña den casonan excepcional di urgencia. Unabes e dos aña aki transcuri, e reglamento general di gobierno automaticamente ta keda sin efecto. E ley di Reino of e reglamento general di gobierno por encarga of otorga na otro organonan e facultad pa establece reglanan adicional. E encargo of concesion na e paisnan ta bay ser haci mediante e legislatura of gobierno di e paisnan.

2. E di dos paragraf ta keda sin efecto. E di tres y di cuatro paragraf ta renumera como di dos y di tres paragraf.

B
Articulo 38, paragraf 2, ta cambia di e siguiente manera:

1. E frase “pa ley di Reino of pa reglamento general di gobierno” ta keda reemplasa pa: pa ley di Reino.

2. Ta agrega e siguiente frase: Den casonan excepcional di urgencia, por establece e Ley di Reino pa un reglamento general di gobierno cu no ta basa riba un ley di Reino y cu tin un duracion maximo di dos aña. Unabes e dos aña aki transcuri, e reglamento general di gobierno en cuestion automaticamente ta keda sin efecto.

Articulo II
 Na momento cu e ley di Reino aki drenta na vigor, e reglamentonan di gobierno general existente na cual ta haci referencia den Articulo 14 paragraf 1, of den Articulo 38, paragraf 2 di Statuut, cu no ta basa riba un Ley di Reino, ta keda vigente durante un maximo di cuatro aña despues cu e ley di Reino aki ta drenta na vigor. Den casonan excepcional, un Decreto Real por determina cu un reglamento general di gobierno cu no ta basa riba un Ley di Reino por keda vigente.

Articulo III

E ley di Reino aki ta drenta na vigor e prome dia di e di dos mes calendario despues di e fecha di publicacion den e Staatsblad.

Ta duna orden y ta manda pa e ley di Reino aki keda publica den e Staatsblad, den e Afkondigingsblad di Aruba, e Publicatieblad di Corsou y e Afkondigingsblad di Sint Marten, y pa tur ministerio, autoridad, organismo y funcionarionan pertinente cumpli cu su ehecucion exacto.

E publicacion tin fecha 21 di october 2023, y ta firma pa Rey Willem-Alexander, minister presidente Mark Rutte, y Secretario di Estado pa Asuntonan Interno y Relacionnan di Reino, Alexandra van Huffelen.