Ayera anochi a tuma luga e prome anochi di e simposio organisa conhuntamente pa Fundacion Gobernacion di Calidad Aruba (FGCA) y Universidad di Aruba. E evento ayera nochi ta e prome den un serie di tres unda lo tene dialogo extenso riba e topico di entre otro bon gobernacion y corupcion. Nos lo raporta riba e siguiente anochinan den nos proximo edicionnan.
Tres persona a duna presentacion riba diferente aspecto cu tin di haber cu bon gobernacion, di acuerdo cu nan experticio specifico. E prome persona cu tabata na palabra ta presidente di FGCA Armand Hessels, sigui pa Nelly Schotborgh y finalisando cu Willeke Slingerland.
Sr. Hessels a bay den detaye tocante e diferente elementonan cu ta encera mal gobernacion. Segun sr. Hessels, kende a haci varios investigacionnan y a publica bukinan riba e topico, tin 3 elemento primordial cual ta sintoma di mal gobernacion. Esta patronahe politico of nepotismo, administracion financiero deficiente y proyectonan faya y/of sospechoso.
E ta splica cu tin diferente manera con e administracion financiero di un gobierno por ta deficiente. E elementonan aki ta causa cu e gobierno ta pidi mas y mas prestamo cual tin consecuencia cu e ta yega na deficit den e presupuesto mas halto.
Kita subsidio di fundacionnan
Pero segun sr. Hessels e gobierno ta purba tapa esaki pa medio di kita subsidio di fundacionnan y baha e presupuesto di cierto departamentonan. “Bo por wak por ehempel cu despues di tempo hopi fundacionnan no por sigui funciona ya cu no tin suficiente sosten. Esaki no ta cuadra cu e imagen cu ta wordo duna di ta benefactor pa pueblo.”
Aki sr. Hessels a elabora cu no ta un partido specifico cu ta culpabel pa e actonan aki. Desde comienso di nos Status Aparte no a bin mucho cambio na e situacion di mal gobernacion den nos pais.
Casonan studia na nivel di Reino
Sra. Schotborgh a studia criminologia y bon gobernacion na e Vrije Universiteit van Amsterdam. Na e universidad el a traha riba su tesis titula De wortels van ambtelijke fraude en Corruptie in Caribisch Nederland. Durante su presentacion el a comparti su investigacion tocante e casonan civil, penal y administrativo den cuadro di corupcion (riba potret)
Red di corupcion na Hulanda, EU y internacionalmente
Sra. Slingerland a elabora cu te hasta na Hulanda, cual hopi hende ta pensa cu lo tin bon gobernacion na tur nivel, ta trata cu casonan di mal gobernacion. Na Hulanda nos ta wak mas cu e cultura di critica personanan por ehempel den bo departamento no ta bin dilanti. Asina aki e casonan di corupcion por sigui crece.
Entre otro sra. Slingerland a expresa cu corupcion no ta un crimen sin victima. El a duna un ehempel unda un bar cu a cende na candela a mata varios personanan. Pero tras di porta cera e doño di e bar tabata amigo di un oficial, pues e no tabatin mester di preocupa su mes cu regulacion.
Na final personanan cu a atende e evento a haya chens pa puntra esunnan cu a presenta tocante e topico di mal gobernacion. Redaccion a tuma nota di varios persona di institucionnan como KvK, VNO, Conseho Electoral y Universidad di Aruba cu a atende. Pero tambe profesor, studiante, candidatonan riba lista di partidonan chikito, hobennan y representantenan di isla ruman Bonaire.
Den proximo edicion lo elabora mas extenso riba e topiconan cu esunnan cu a presenta a toca y e dialogo entre e comunidad y mesun personanan aki.
Segun e programa cu e organisadonan a presenta, mañan lo toca e estado di checks and balances na Aruba y e importancia di movemento civil y poderacion di hende muhe pa realisa bon gobernacion.
