Inflacion ta e fenomeno unda prijs di diferente producto di bida diario ta hisa. Esaki por tuma hopi forma pasobra tin ambos prijs di compras chikito por ehempel, manera cuminda y gasolin; na otro banda tin e prijs di capital goods, manera cas y tereno. E autor aki analisando ambos factornan internacional y local ta di e opinion cu un ola nobo di inflacion por ta na caminda.
Pa e lesador, esaki simplemente kiermen cu su placa den terminonan real lo bal menos. Esaki na un tempo cu pueblo ya caba ta confrontando dificultad den forma profundo.
Factornan Internacional
E factor mas grandi den inflacion ta e accionnan di Banconan Central grandi manera e US Federal Reserve (FED) y Banco Central Europeo (ECB). Ayera dia 14 November 2023, nos por a nota cu mercadonan financiero cu ambos prediccion oficial di banconan grandi manera UBS y Wells Fargo y na e opinion di encuesta di Fund Managers grandi ta di e opinion cu e nivel global di interes lo cuminsa baha muy pronto.
Si interes cuminsa baha, inflacion lo probablemente cuminsa hisa atrobe. Pa haci esaki mas potente, tin mas cu 5.1 triyon US Dollars para den “Money Market Funds”, cual lo cuminsa drenta mercadonan financiero si interes en berdad cuminsa baha, manera cu consenso financiero ta anticipa.
Factornan Local:
E autor di articula aki kier bisa den forma duidelijk cu no ta critica Banco Central di Aruba (CBA) den niun manera. E decisionnan cu mester wordo tuma ta debi na factornan masha complica y e team hopi experto ta haci un afweging di tur factor.
Nos por nota si cu CBA ta indica cu nivel di inflacion na Aruba a baha y cu e “excess liquidity” na banconan comercial a baha hopi. Considerando esakinan a kies pa un bes mas baha “Reserve Requirement” di banconan comercial.
Normalmente esaki lo causa cu lo tin mas placa lo drenta circulacion local. Esaki normalmente lo hisa inflacion.
Conclusion:
Si en berdad interes na nivel internacional cuminsa baha y cu mas placa den circulacion na nivel local, esaki ta pone e autor den e opinion cu nos por experiencia un otro subida di inflacion na Aruba.
Esaki ta un opinion y no un conseho financiero den ningun manera. Bisando esaki, e autor ta puntra pa nota e factornan aki den un analisis mas grandi door di expertonan concerni.
