Den un pais moderno, un sistema solido di pensioen ta un di e derechonan mas cardinal den un sociedad, pa proteha tambe esnan di menos recurso y e grupo aki tambe di un futuro humano. Na e momentonan aki na Aruba caba ta tende storianan dramatico di pensionadonan cu mester sigui traha pasobra nan simplemente no por biba riba e pensioen di SVB.

Esaki riba su mes caba ta algo profundamente lamentabel. Pa haci esaki pio y riba nivel di un tragedia di Opera, por conclui cu Pensioen Fonds sociaal di SVB lo ta failliet pa aña 2032.

E declaracion aki ta basa riba SVb su mesun Jaarverslag 2020 pagina 24.

Ademas riba pagina 25 tin e siguiente skirbi: “Dat de OuderenFonds onder de huidige omstandigheden niet lang houdbaar zal blijven.”

Na ningun momento mi persona a bisa cu e fonds ta den acute nood di un perspectiva di liquiditeit inmediato.

Un Desaster Gigantesco
E autor ta basa esaki riba combersacionnan anonimo cu ex-ehecutivonan di Banco Central di Aruba y simplemente usando e reportahenan di SVB mes.

Imagina bo:
Bo ta un trahador honesto, sin otro moda di pensioen priva.
Bo a soda tur dia y traha duro.
Bo a paga bo premie honestamente.
Sperando na fin di yega bo edad di pensioen cu finalmente por wak algo back di esaki.

Awo imagina cu bo lo haya un carta bisando.
“Sorry e placa no t’ey.”

Data di SVB Jaarverslag 2020:
Esaki no ta cualke fantasia.
Usando e jaarverslag mas reciente di SVB mes cual ta di 2020.
https://www.svbaruba.org/organisatie/jaarrekening-svb/?lang=nl

Ya caba ta un problema profundo cu no tin jaarverslag mas recien.

Ta invita pueblo di Aruba y vooral expertonan economico pa studia e documentonan aki y pa puntra preguntanan hopi critico over e hecho cu den nan mesun jaarverslag, SVB su mes ta admiti cu sin medidanan extremo manera stipula den e landspakket, e fondo lo ta bashi bashi pa 2032.

Esaki tambe no ta tuma den cuenta cu por bin periodonan dificil economico riba nivel global, cual e autor a skirbi hopi over di esaki den pasado. Tambe e situacion di salubridad simplemente malo di Aruba su populacion, cual mester tuma na cuenta.

Unda e Check & Balances a Keda?

Den un pais democratico ta suppose di tin varios “Checks & Balances”
Na prome nivel e conseheronan di un Ministro.
Despues e colega Ministronan den un coalicion por spreek aan e Minister concerni.
Si esaki tampoco no pasa tin Parlamento y principalmente oposicion, cu tin como tarea pa pone pueblo na haltura di e tragedia aki.
En fin si tur esaki faya lo tin otro institutonan cu mester grijp in.

Te cu e autor aki sa, y na miho di su mesun conocemento ta papia relativamente hopi tiki over e topico aki, bezig ta wak e dimension severo di e problema aki.

Kibra Cultura di Miedo

Los di e articulo singular aki, e autor ta sinti cu mester kibra e cultura di miedo na Aruba. Porta tin hende cu kier alerta pueblo of instancianan concerni over varios cos pero simplemente no ta haci esey paso lo wordo difama, lo wordo boicotia y eventualmente castiga. Simplemente pa un opinion honesto cu ademas ta basa riba data concreto.

E autor ta spera cu e no lo mester sufri cualke forma di castigo pa atende pueblo na esaki.

Tambe por wel di ta cu mi conclusionnan no ta klop, y ta invita un dialogo riba un nivel halto y adecua sin ataca persona individual pa papia over e tampoco aki. Ta spera en berdad pa pueblo di Aruba en general cu mi opinion ta fout.

E autor tambe kier indica publicamente cu e no ta plania di drenta of lanta un partido politico.