Na momento cosnan positivo tuma lugar den gobernacion y politica, esaki tambe mester wordo nota. P’esey nos kier a dedica un columna pa pone den spotlight loke mi persona ta wak como desaroyonan bastante positivo. Ta spera cu esaki lo sigui y cu frutanan cu lo por sali crea mas momentum ainda.
Inteligencia Artificial
E ta sin duda pa mi persona cu Inteligencia Artificial por tin un impacto positivo masivo pa full Aruba, p’esey mi ta sumamente contento cu ambos parlamentarionan y Prome Minister mes a tuma nota di esaki. Riba medionan local, a sali un articulo largo con AI lo por yuda den varios areanan economico. Jammer genoeg esaki parce no a haya hopi feedback positivo di hende. Pero si en berdad por usa AI pa na prome luga spaar y crea eficiencianan mas halto y despues te hasta pilarnan economico nobo cu lo crea mas entrada pa nos pais y sector priva. Esaki por ta algo hopi positivo mes.
Verf Anti-Solar riba edificio di Gobierno
Mi ta contento pa wak cu varios edificio cu ta cay bou Gobierno a cuminsa verf nan dak blanco, esaki ta e caso cu por ehempel edificio deportivo Betico Croes na Santa Cruz. Si en berdad nos por spaar electricidad na nivel nacional, e spill-overs lo por ta hopi grandi. E spill-overs positivo di baha prijs di coriente lo wordo elabora den detaya dor di mi persona den e columna di inovation e siman aki.
Agricultura avansa na caminda
Mi a enfoca varios bes riba e tema di agricultura avansa local, pa asina baha prijs di comestibelnan, pa reduci dependencianan externo y pa baha nos deficit den cuenta coriente. Por nota den e peticionnan publico di subsidio di Union Europeo cu tin un peticion pa traha un vertical farm hopi avansa. Esaki en berdad por ta algo sumamente bunita.
Usa e Entrada & Besparing pa sigui inverti
Awo cu ta parce cu tin movementonan den direccion positivo, lo ta hopi importante pa nos inverti e frutanan cu esaki lo trece den inversionnan follow-up cu return-on-investment halto y pa sigura nos sistemanan social.
Si gobierno lo por bin cu renteloze leningen pa pueblo spaar riba suma mensual di coriente lo ta un follow-up importante. Na di dos lugar crea pilarnan economico nobo basa riba e tecnologianan menciona manrae AI y agricultura avansa, manera ta pasando awo. Por pensa di trek aan companianan MicroSaaS international of di un facilidad di Super Computing. Esakinan tur ta inversionnan cu RoI hopi halto.
Na final tur esaki mester beneficia pueblo, den contexto aki un parti di e entradanan & besparingen lo mester bay directamente den nos vangnet sociaal di SVB, AZV y mi ta spera den futuro un “Universal Basic Income” (chikito na cuminsamento).
Mi ta sumamente contento si pa nota cu mi esfuerso di skirbi publicamente a haya acogida na nos clase politico di mas halto. Semper tabata mi speransa pa mi publicacionnan yuda crea un Aruba miho pa full nos pueblo. Tur esaki ta sigui duna mi e motivacion pa sirbi pueblo cu mi columnanan den un manera neutral di politica, pa asina nos crea un Aruba unda nos tur lo kier biba dje.
