Ayera mi persona a tuma e oportunidad di a confronta Minister Dangui Oduber di Ministerio di Turismo y Salud cu mi preocupacionnan locual ta e situacion di SVB na e reunion di “Ban Topa” di partido MEP organisa na Noord riba 9 di November.

Eynan a puntra e gobernante pa reacciona publicamente riba mi preocupacionnan como ciudadano. Behalve cu e gobernante a reacciona na mi persona den tono rabia y cu personanan den e meeting a cuminsa yama mi persona nombernan insultivo manera “lolo”, el a eis di mi persona pa mi usa data mas up-to-date y pa duna e analisis aki publicamente pa rectifica mi declaracionnan. Tumando nota di esaki, a skirbi e siguiente update di mi analisis.

Struisvogel Politiek:

Prome cu mi duna mi analisis up-to-date, un bes mas usando SVb su mesun cifranan, mi kier bisa hopi duidelijk cu e autor ta hay’e masha tristo mes cu ningun conferencia di prensa of declaracion oficial a sali di Ministerio di Turismo y Salud of di SVb. Esaki ta di mainta 10 di November cu a check ambos e website di SVb y e Facebook oficial di Minister Oduber. Ta algo profundamente lamentabel cu parce cu e instancianan concerni no kier ni papia den manera oficial di e situacion aki y ta simplemente purba ignora e problema.

Begroting 2023 di SVb:

Ta basa mi analysis up-to-date riba SVb su mesun “Begroting 2023” cu por wordo haya via e siguiente link:
https://www.svbaruba.org/wp-content/uploads/2023/01/Begroting-2023-SVb-en-fondsen_NOV6_2022.pdf

Lo declara atrobe cu SVb no ta den un ‘nood acuut’, pero segun nan mesun proyeccionnan usando tur e data di meevallers economico, nos ta wak despues di aña 2024 e “surplus” anual ta keda baha masha hopi mes.

Den aña 2024 ta spera un surplus di 28.9 miyon florin y na 2026 esaki lo ta solamente 11.1 miyon florin. Esaki no ta nada straño pasobra den e Jaarverslag 2020 a premira cu lo tin un surplus te na 2026 y cu na 2027 nos lo cuminsa drenta estadonan di deficit.

Usando SVb su mesun Facebook post, tin 134.6 miyon den likides den e fondo.
Cu ta mas halto cu esun premira den e jaarverslag di 2020.

Pero usando atrobe SVb su mesun proyeccionnan, hasta si e fondo lo tabatin un likides di 180 miyon florin pa 2028, esaki lo simplemente prolonga e situacion un poco. Hasta den e situacion ultra-positivo aki e fondo lo ta bashi pa 2036. Esaki ta basa riba e jaarverslag 2020, pagina 24.

Minister Oduber ta hunga Sinterklaas:

Awo durante e nochi di “Ban Topa” esnan presente a keda hopi contento mes ora cu Minister Oduber a anuncia cu otro aña uitkering di AOV lo hisa un bes mes!

E gobernante a bisa cu e fondo ta solido y cu no tin ningun problema.

P’esey por parti regalo cu un achtergrond politico cu no ta basa riba un logica responsabel.

Ta pidi pa e projecties updated: post-2030

Mi persona ta pidi un bes mas aclaracion di Ministerio di Turismo y Salud y SVb pa publica nan proyeccionnan nobo di e fonds despues di 2030 te cu 2040. Eynan nos lo wak den mi punta di bista e berdad bin di dilanti cu algun momento entre 2032-2036 e fondo lo ta bashi.

Pero pa esaki ta wardando e declaracion oficial, cu te ainda te na mi miho conocemento no a wordo publica na escrito di e articulo aki.