Nos ta den un crisis grandi di Salubridad. Fo’i un perspectiva di fondonan di AZV riba plaso largo, pa un Hospital full yen, pa un situacion di e salud di pueblo alarmante pa un walk-out di trahadornan di HOH. Mester bin cu solucionnan den manera urgente y usa tur e “low hanging fruit” cu por tin. Den e perspectiva aki innovacion por brinda hopi posibilidad positivo, na prijsnan sumamente atractivo den forma inmediato. Ta mi speransa tambe cu tur loke ta publica tambe wordo usa den e perspectiva aki.
Usa Databasenan Existente pa Modela Riesgo di Malesa
Como un pais relativamente moderno, nos sector di Salubridad esta Dokter di Cas, AZV, Botica y Hospital tur tin databasenan relativamente “rico”. Den un mundo optimal lo purba trece tur e data aki, den un database centralisa pa analisis sofistica. Pero esaki pa data di salubridad ta hopi complica y lo costa tempo.
Kico si por wordo haci inmediatamente ta pa analisa cada dataset apart cu ya caba t’ey. Awendia un team chikito di developers specialisa usando tur e tools y hermentnan di Inteligencia Artificial lo por traha un sistema di “Data Visualization & Pharmacokenetic Modeling” den un par di siman.
Haciendo esaki nos lo por duna e dataset cu e sistema aki na estadisticonan specialisa den data medico y riba plaso mas largo den sistemanan di AI. E mer lo ta pa crea algoritmonan cu por pronostica den manera super preciso y personalisa, ken ta core e riesgo mas grandi pa un evento negativo di salud acuut. Esaki ta yama “Predictive, Personalized & Precision Medicine”. Esaki siguramente ta algo super realistico pa instancianan manera AZV y Hospital.
Nurse basa riba Inteligencia Artificial
Un problema acuut cu nos ta wak na Aruba ta cu e personal medico ta bou un presion demasiado grandi. E nivel di stress y burn-out ta hopi halto. P’esey tambe ta wak cosnan manera walk-outs na Hospital dor di personal.
Awo un tool cu lo por wordo usa ta esun di Nvidia yama “Polaris” cu ta un Nurse basa full riba AI y cu ta full automatisa y riba nivel di un nurse humano den varios area. Nos situacion di deficit den personal ta asina erg cu den ningun manera hermentnan asina lo por toca e necesidad fundamental pa nurse humano, pero sea por ta un alivio pa hopi di esnan cu ta sinti demasiado presion trahando den sector di Salubridad na Aruba.
Automatisa Patologia y Radiologia:
Paso tin un deficit asina grave di dokternan specialisa cu ta crea limitacionnan visibel cual den tempo di COVID tabata masha evidente, cu no tabatin suficiente personal pa analisa foto di pulmon.
Awo den e mesun trend cu tin deficitnan severo, por laga radioloog y patholoog na HOH y IMSAN usa e toolsnan di mas sofistica den nan area manera “UNI” y “CONCH”, cu por analisa tur imagennan radiologico y patologico den manera automatisa na un nivel di specialista humano.
Pasobra tin deficit y listanan di espera asina grave no tin nodo di kita niun humano di trabou, pero sea como hermentnan pa brinda alivio y reduci tempo cu pashentnan mester warda.
Atrobe nos mester bisa cu tur e hermentnan menciona ta disponibel awe mes, y por brinda alivio inmediato den sentido di costo, tempo di espera di pashent y directamente sufrimento humano.
