Den un evento quasi-positivo nos lo nota e Conferencia ‘Community Development from Concept to Completion’. E meta y intencion ta echt sumamente positivo y pa elogia, tremendo iniciativa.

Pero cerca mi persona a surgi un par di pregunta basta cardinal cu mi ta spera lo haya contesta riba dje.

Na prome lugar, ta papia di inversionistanan internacional. Ta ki gruponan e inversionistanan aki ta? Mi por ta full mal informa pero di loke mi sa, mi no a wak ningun nota di representantenan di por ehempel BlackRock, Investment Banks manera Goldman Sachs of ABN Amro, Pensioenfondsen grandi manera APF di Hulanda of Sovereign Wealth Funds di por ehempel Noruega of Singapur. Por wel ta cu tabatin representantenan di organonan halto presente. Mi lo kere pueblo lo kier sa ken esakinan ta.

Un otro pregunta hopi mas preocupante cu ta surgi cerca mi persona ta cu na e conferencia ta pusha ‘Offshore Wind’ versus ‘Solar Decentralisa’. Mi persona por ta full fout, pero di loke ami ta nota di por ehempel rapportnan amplio di Investment Bank Lazard cu den caso di Aruba na nivel strategico di plaso largo. Solar Decentralisa cu Mini-Grids lo ta e ruta mas beneficioso pa pueblo.

Esaki ta puro speculacion di mi persona, pero e concepto di Offshore Wind ta gewoon parce mi un metodo pa tene generacion di coriente centralisa cerca Utilities y Elmar.

Mi lo bisa e siguiente den placa chikito: “Dentro di 10 aña, Elmar N.V no lo tin bestaansrecht den su forma cu nos conoce awo.”

Tur poging pa tene un organisacion bibo cu fundamentalmente no lo ta levensvatbaar den futuro cercano siguramente NO ta den beneficio di pueblo riba plaso largo strategico. Pasobra ta pueblo lo ta pagando pa tene Elmar riba life support artificial.

Un delaster punta, kico ta e Return-on-Investment proponi cu tur e proyecto positivo menciona lo tin? Pasobra mi ta sospecha cu banconan local y fondonan di pensioen local lo inverti tambe den esakinan. Dus ta indirect spaarpot di pueblo lo wordo mobilisa. Cual no ta nada malo y ta algo positivo. Pero e lo mester bay den e miho proyectonan na beneficio di pueblo berdadero.

Pero kier nota cu e opzet y organisa e conferencia menciona ta uno hopi positivo y cu iniciativanan asina mester wordo stimula. Pero pueblo merece mas detaye si pa averigua tur cos.

Nota di redaccion

E conferencia ‘Community & Development from Concept to Completion Summit’ tabata un actividad durante cual diferente instancia local a reuni cu expertonan Mericano pa un ‘roundtable discussion,’ manera minister di Transporte, Naturalesa, Integridad y Asuntonan di Adulto Mayor, Ursell Arends a splica riba su rednan social.

Segun e minister, e actividad aki ta parti di un programa di algun dia pa asina e actornan invita por cera conoci cu otro y mira unda por haya colaboracion pa beneficio mutuo. E minister alabes a comparti su deseo y speransa cu e conferencia aki por bolbe tuma lugar proximo aña na Aruba.