Ora cu mi a skirbi over e fondonan social esta SVB y AZV den mi prome articulonan publico, esaki tabata algo masha controversial mes. Aunke cu mi ta simplemente usa jaarverslagen y rapportnan di e fondonan of di Centrale Bank van Aruba.
Awo usando e relato financiero mas recien di AZV (2023) cu a wordo publica e siman aki, nos por wak un grafico cu AZV mes a traha. Pa ta duidelijk esaki no ta mi mesun berekening of modelonan pero esta di AZV mes.
Ami ta asina den shock cu un grafico asina simpel pero cu consecuencianan masha profundo mes no ta hayando ningun atencion di nivel halto cu nos como pueblo lo mester spera. Pa ta duidelijk e siguiente grafico ta mustra cu pa 2035, tur e reservanan di AZV lo a caba. Den otro palabra, AZV lo bay failliet pa 2035.
Dicon ningun Politico ta papia tocante esaki?
Ora nos papia di algo asina cardinal manera nos fondo social di salud publico, mi ta asumi cu e ta un tema importante pa nos representantenan politico. Pero desde cu mi a cuminsa skirbi tocante esaki, te dia di awe ningun politico a tribi di touch e time bomb aki. Pio te hasta pa gana voto riba plaso corte, ta papia di baha premies di AZV. Cual ta algo sumamente tristo mes, cu nos no ta bezig ta papia riba un nivel serio over con nos lo por tene e fondo sostenibel riba termino largo.
5.000 camber di hotel extra: 15.000 cheap labor cu derecho di AZV
Mas espantoso ainda ta e rapport di Aruba Bird Life Foundation cu ta mustra cu aproximadamente 15,000 pa 20,000 hende extra lo mester bin Aruba pa traha den e sector di turismo pa si e cambernan extra lo bin. Ban no lubida cu mayoria di e trahadornan lo ta di nivel salario minimo of casi asina abou. Pero nan lo haya derecho inmediato riba AZV y SVB. E fondonan ya caba ta un time bomb, si e scenario cu ABL Foundation ta pinta ta gasolin lo tira riba e candela.
CAft ta hipocrita
Ami como analista neutral a perde tur mi speransa dia cu CAft den su anuncio di prensa a bisa “de sociale fondsen zijn in goede staat.” Ainda mi no por compronde con por bin na un conclusion asina mientras cu AZV mes ta bisa cu nan lo bay failliet pa 2035. Mi ta sumamente desapunta den CAft y pa mi persona nan a perde tur nan credibilidad como organo neutral cu mester grijp in prome cu e time bomb di AZV bira un desaster inmenso.
Modelo di AZV: Kico e ta asumi?
En fin e calculacionnan probablemente di AZV ta asumi cu no lo bin niun recesion economico den e añanan binidero. Awo kico lo pasa si un recesion global of un ola grandi di inflacion mester dal Aruba y full mundo manera m’a adverti asina hopi biaha den media publico?
E ora e proyeccion lo bira mas scur ainda.
Politico y pueblo mester lanta fo’i soño
Nos gobernantenan y politiconan y autoridadnan mester finalmente mustra madurez y enfrenta e situacion aki prome cu e bira un desaster mes. Ta keda na pueblo tambe pa finalmente wak tur loke ta sosode den un manera critico y pa demanda di politiconan pa tuma accion.
