E festival di Nuevo Mundo y academia ta un oportunidad pa musiconan tanto local como internacional por siña mas. 85 studiante musico lo ta presente, pero tambe lo bin mas o menos 23 profesor di musica, kendenan lo ta dunando les di musica tanto na studiantenan local como esunnan internacional. Durante e dianan di e festival y academia, e musiconan lo tin e oportunidad di siña mas for di otro.
Desde aña pasa e studiantenan tabata prepara nan mes pa participa na e festival aki y academia. Sr. Simon Gollo di e academia a wordo puntra si e nivel di e musiconan di Aruba ta mas abou di esunnan cu ta biniendo. “Mi no ta kere cu ta trata di pone e contexto ariba y abou. E ta un proceso. Evidentemente si tin musiconan cu ta bin aki pa comparti nan experiencia, esey kiermen cu semper tin algo pa siña,” el a indica. E no ta kere cu tin diferencia entre e nivel di musiconan di Aruba y esunnan internacional. Nunca a wordo mira cu tin A y B. Simplemente aki na Aruba tin hopi mucha cu tin e necesidad di topa cu musica, segun Sr. Gollo. “Nos a bin aki pa comparti e experiencia ey.” El a insisti cu na Aruba tin musico di hopi validez y ta spera cu e festival duna nan e luga cu nan merece. Entre tur e musiconan cu lo t’ey, nan lo comparti nan conocemento y experiencia cu e mayor cantidad di hobennan y mucha cu presenta acerca nan.
Dificil genera vinculo
A puntra Sr. Gollo dicon no a prepara e musiconan di Aruba desde aña pasa, mirando cu esunnan di exterior a haci esaki pa 1 aña largo. El a indica cu tur cos ta un proceso, pasobra awo ta cuminsando cu esaki na Aruba. “Tin biaha ta dificil genera un vinculo. Cuminsa cu un proyecto cu no tin conexion, no ta facil.” E artistanan internacional ta bin Aruba pa aporta. Nan kier aporta un parti esencial cu por ta un educacion na e hubentud, el a bisa.
Oportunidad pa cera conoci
E festival aki ta un oportunidad pa hendenan internacional cera conoci cu e musiconan y personalidad cu tin aki na Aruba. Tur esaki ta un proceso. Pero e proceso aki ta basa riba e educacion, evidentemente e proceso ta wordo basa den establece proyectonan. E profesornan di e scol di musica lo participa, pero tambe duna asistencia, duna informacion, capacitando nan mes cu e evento aki. Tambe e studiantenan lo haci esaki, pero no por bisa cuanto studiante di Aruba lo participa. Nan kier pa hopi studiante di Aruba participa na e academia y festival. Ta importante pa sa cu e musiconan participante cu ta bin di exterior, tambe ta bin pa siña for di e maestronan di musica.
