Ayera tardi a tuma luga un reunion entre minister di Enseñansa cu sindicato SIMAR y SEPPA pa atende cu e anuncio cu a wordo haci pa transforma Dienst Publieke Scholen (DPS) den un fundacion.
Aunke minister Rudy Lampe(RED) a declara sa cu e cambio aki no lo afecta e maestronan, esaki no ta un pildo cu e sindicatonan aki ta guli manda abou.
Prome cu e reunion aki a tuma luga un fuente di directiva di SIMAR a laga sa na e matutino aki cu nan tabata na espera di e reunion cu e minister di Enseñansa pa tene mas claridad, ya cu SIMAR no ta acepta loke e mandatario kier impone of a lo menos con e kier impone.
P’esey nan a pidi un reunion di caracter di urgencia hunto cu SEPPA, ya cu e sindicato aki tin mayoria di docente ambtenaar. Unabes cu e asunto aki ta haya su claridad despues di e reunion cu e minister di Enseñansa, nan lo sinta cu nan miembronan pa evalua e siguiente stap.
E anuncio aki di transforma DPS den un fundacion a causa hopi consternacion, y nan no ta descarta te hasta di bay corte, esaki ta si e necesario. Actualmente ambos sindicato, SIMAR y SEPPA, a cera cabes den e lucha aki na bienestar di nan miembronan y enseñansa en general.
