Diabierna ultimo a yega na un acuerdo cual ta conduci na reanudacion di trabou di parti di e Unit Managernan di Colegio EPI awe.
Bon Dia Aruba a ricibi 2 relato relaciona cu e acuerdo aki, uno di SIMAR y e otro di Minister di Enseñansa Michelle Hooyboer-Winklaar, ambos splicando con a yega na un solucion di e conflicto cu a tuma varios siman.
Den e relato di SIMAR, e sindicato ta bisa cu nan lo reanuda trabou despues cu Minister a acepta e condicionnan stipula pa SIMAR. Y den e relato ricibi di Minister Hooyboer-Winklaar, ta menciona cu ta lamentabel cu a tuma 2 siman di tempo pa yega bek na e mesun proposicion cu a wordo presenta na SIMAR y e Unit Managers.
Den e relato di SIMAR, ta menciona tambe cu durante tratamento di e caso den corte, e abogado di e Minister a bisa cu ta acepta e proposicion di SIMAR. Cual a conduci cu Hues a duna indicacion pa partidonan bay negocia bek. Despues di a haci algun ahustacion chikito, segun SIMAR, a yega na e producto final cual a wordo firma diabierna pa e Managernan y SIMAR.
Di su banda Minister a bisa di ta contento cu SIMAR y Unit Managers a acepta e proposicion original y a scoge pa bienestar di studiantenan y docentenan di e scol. Tambe cu e ta haya cu esaki ta e miho decision cu por a tuma y tin confiansa cu por pone e caso aki tras di lomba.
No ta sigur si e bruhacion aki den e relatonan tin un efecto riba e solucion awor entre e dos partidonan. Por conclui si cu tin un proposicion riba mesa cu ambos partido a bisa cu nan a acepta.
